Read Kurmanji Încîl Hoşêya 5 Bible Online

Hoşêya 5 - Kurmanji Încîl bible

Hoşêya 5

¹«Ya kahinno, guh bidin vê yekê! Ya Mala Îsraîl, baş guhdarî bikin! Ya kesên li qesra padîşah bibihîzin! Çimkî ev hikim li ser we ye. Hûn li Mîspayê bûn dafik, Li Çiyayê Tavorê bûn toreke raxistî.

²Serhildêr her ku çû dane navê, Lê ezê hemûyan bînim rê.

³Ez Efrayîm nas dikim, Erê, Îsraîl ji min ne veşartî ye. Ya Efrayîm! Ji ber ku êdî te zina kir, Îsraîl qirêj bû.

⁴Karên wan nahêlin ew vegerin Xwedayê xwe. Ji ber ku di nav wan de ruhê zinayê heye, Ew Xudan nas nakin.

⁵Quretiya Îsraîl şahidiyê lê dike. Efrayîm yanî Îsraîl, li sûcên xwe diterpile, Cihûda jî bi wan re diterpile.

⁶Wê bi pez û dewarên xwe herin li Xudan bigerin, Lê wê nebînin. Çimkî Xudan ji wan dûr ketiye.

⁷Bêbextiyê bi Xudan kirin, Bêyî ku bizewicin zarok çêkirin. Êdî Heyva Nû wê wan û zeviyên wan daqurtîne.

⁸«Li Gîvayê li boriyê, Li Ramayê li borazanê bixin! Banga şer li Bêtawenê bikin, Ya Binyamînîno, dijmin li pey we ye!

⁹Di roja darizandinê de, Wê Efrayîm xerab bibe, Tiştên ku wê esse pêk bên, Ez niha ji eşîrên Îsraîl re radigihînim.

¹⁰Serekên Cihûdayê mîna wan kesan in Ku cihê kevirên sînor diguherînin. Ezê xezeba xwe wekî lehiyê bi ser wan de bînim.

¹¹Efrayîm hat tengezarkirin, Li ber dîwanê hat perçiqandin, Çimkî da pey tiştên pûç û vala.

¹²Ez ji bo Efrayîm wekî bizûzê me, Ji bo Mala Cihûda jî wekî kifikê me.

¹³«Gava Efrayîm nexweşiya xwe, Cihûda birîna xwe dît, Efrayîm çû Aşûrê Û ji padîşahê mezin alîkariyê xwest. Lê ew nikare şifa bide we, Nikare birîna we bikewîne.

¹⁴Çimkî ezê li dijî Efrayîm bibim wekî şêrek, Ji bo Mala Cihûda bibim wekî şêrekî ciwan. Ezê wan perçe bikim û bihêlim; Ezê wan bibim û wê tu kes rizgar neke.

¹⁵Paşê ezê vegerim cihê xwe, Heta ew sûcên xwe qebûl bikin Û li rûyê min bigerin, li wir bimînim. Gava bikevin tengasiyê, wê li min bigerin.»