Read Kurmanji Încîl Hoşêya 9 Bible Online

Hoşêya 9 - Kurmanji Încîl bible

Hoşêya 9

¹Ya Îsraîl, şa nebe! Wek gelên din kêfxweş nebe! Ji ber ku te bêbextî li Xwedayê xwe kir, Te zina kir. Di tevahiya bênderên dexlan de, Te ji destmiza fahîşeyan hez kir.

²Wê bênder û mehsere gel têr nekin, Hêviya şeraba nû wê vala derkeve.

³Wê li diyarê Xudan nemînin, Wê Efrayîm vegere Misrê Û wê li Aşûrê xwarina nepak bixwin.

⁴Wê pêşkêşiyên şerabê ji Xudan re nerijînin, Wê qurbanên wan wî razî nekin. Pêşkêşiyên wan bibe wek nanê şînê Ku kesê bixwe nepak bibe. Wê nanê wan tenê zikê wan têr bike; Ew nan wê nekeve Mala Xudan.

⁵Hûnê di roja cejnê de, Di roja cejna Xudan de çi bikin?

⁶Çimkî heger ji ber helakê birevin û xilas jî bibin, Wê Misir wan bide hev, Wê Memfîs[17] wan binax bike. Tiştên wan ên zîv ên binirx, Wê bibin ên giyayê gezgezkê, Wê di konên wan de dirî şîn bibin.

⁷Rojên cezakirinê hatin, Rojên hesabkirinê hatin, Bila Îsraîl vê bizanibe! Lê ji ber zêdebûna sûcê te Ji ber mezinahiya dijminatiya te, Li gorî we pêxember ehmeq, Mirovê ruhanî jî dîn e!

⁸Ji bo Xwedê, pêxember nobedarê Efrayîm e. Lê li seranserê riyên wî dafik hene, Li Mala Xwedayê wî jî dijminatî heye!

⁹Wek di rojên Gîvayê de, Her ku çû dilê wan xerabtir bû. Xwedê wê neheqiyên wan bi bîr bîne, Cezayê gunehên wan bide.

¹⁰«Min Îsraîl li çolê wek weşiyeke tirî dît, Bav û kalên we wekî berê pêşî yê darhejîrê dît. Lê ew hatin Baal-Peorê û xwe spartin tiştê şermê, Bi qasî tiştê ku jê hez dikirin kirêt bûn.

¹¹Loma rûmeta Efrayîm wê wek çivîkekê bifire û here, Wê ne zarokanîn, ne bizarobûn, Ne jî bizaromayîn hebe.

¹²Heger zarokên xwe mezin jî bikin, Ezê wan ji zarokên wan bikim Ku kesek nemîne. Wey li wan kesan Ku ez wan biterikînim!

¹³Demekê min Efrayîm dît, Ew wek Bajarê Sûrê bû Ku li mêrga xweş hatiye danîn. Lê niha divê Efrayîm zarokên xwe bajo ber mêrkujan.»

¹⁴Ya Xudan, tiştê ku tê bidî wan bide! Malzarokên ku zarok jê diçin, Pêsîrên ji şîr ketî bide.

¹⁵«Tevahiya xerabiyên wan li Gîlgalê destpê kir. Loma min li wê derê ji wan nefret kir. Ji ber xerabiya karên wan Ezê wan ji mala xwe bavêjim. Êdî ezê ji wan hez nekim, Tevahiya serekên wan serhildêr in.

¹⁶Li Efrayîm hat xistin. Koka wan ziwa bû, Wê êdî ber nedin. Heger ew zarokan bînin dinyayê jî, Ezê berê zikê wan ê delal bikujim.»

¹⁷Xwedayê min wê wan red bike, Çimkî guh nedan wî. Wê di nav miletan de Wek ewareyan bigerin.