Read Kurmanji Încîl Ovadya 1 Bible Online

Ovadya 1 - Kurmanji Încîl bible

Ovadya 1

¹Dîtiniya Ovadya: Reb Xudan li ser Edomê wiha dibêje: Me ji Xudan xeberekê bihîst, Ji miletan re qasidek hate şandin ku dibêje: «Rabin em şerê Edomê bikin!»

²Xudan ji Edomê re dibêje: «Ezê te di nav miletan de esse biçûk bikim, Wê herkes te gelekî kêm bibîne.

³Quretiya dilê te tu xapandî! Ya kesê ku di şikeftên zinaran de dijî, Ya kesê ku mala xwe li bilindciyan ava dike! Tu di dilê xwe de dibêjî: ‹Kî dikare min bîne xwarê?›

⁴Tu wekî teyran bilind jî bibî, Tu hêlîna xwe di nav stêran de jî ava bikî, Ezê dîsa jî te ji wir bînim.» Ev e gotina Xudan.

⁵«Heger diz an talanker bi şev bihatana pêşiya te, Ma bi tenê tiştên têra wan dikir, nedibirin? Heger yên tirî diçinin, biketana rezê te, Ma wê çend weşî ji te re nehiştana? Xerakirina mezin li benda te ye!

⁶Wê her tiştê Esaw bê talankirin, Wê xezîneyên wî yên veşartî bêne derxistin!

⁷Hemû peymangirên te, Wê te ji axa te bajon. Mirovên tu bi wan ewle yî Wê te bixapînin û zora te bibin. Kesên nanê te xwarin, Wê dafikan deynin pêşiya te. Lê wê haya te jî jê tunebe.»

⁸Gotina Xudan ev e: «Wê rojê ezê şehrezayên li Edomê, Zanayên li çiyayên Esaw tune bikim.

⁹Ya Têman[1], wê mêrxasên te bişikên, Wê hemû kesên li çiyayên Esaw helak bibin.

¹⁰«Ji ber zordariya te li Aqûbê birayê xwe kiriye, Wê şerm li ser te be, Tê heta hetayê helak bibî!

¹¹Çimkî roja xerîb mal û milkên wî talan kirin, Roja biyanî ketin dergehên bajêr Û ji bo Orşelîmê pişk avêtin, Tu jî dûr sekinî û bûyî wekî wan.

¹²Di wê roja xerab a birayê xwe de, Divê te bi şahî lê mêze nekira. Di wê roja wan a helakbûnê de, Divê tu li ser Cihûdayiyan şa nebûyayî. Di wê roja teng de, Divê te oxweşikê xwe nekira.

¹³Di roja felaketa wî de, Divê tu neketayî dergehê gelê min. Di wê roja felaketa wî de, Divê te bi şahî li xerabiya wî mêze nekira. Di wê roja felaketa wî de, Divê te talanê mal û milkê wî nekira.

¹⁴Divê ji bo kuştina revpêketiyên wî, Tu li ber devê riyan nesekiniyayî. Di wê roja teng de, Divê te kesên wî yên sax mane Nedana destê dijmin.»

¹⁵«Roja Xudan a li dijî hemû miletan, nêzîk bû. Ya Edom, te çi kiribe, Wê hema wisa jî li te bê kirin. Wê kirinên te bên serê te.

¹⁶Çawa we[2] li çiyayê min ê pîroz, Ji tasa felaketê vexwar, Wê hemû milet jî wisa vexwin, vexwin, Heta tune bibin! Çawa ku qet nebûne.»

¹⁷«Lê kesên filitîn, Wê li Çiyayê Siyonê bicivin Û wê ew der bibe cihekî pîroz. Wê Mala Aqûb dîsa bibe xweyê milkê xwe.

¹⁸Mala Aqûb wê bibe agir, Mala Ûsiv wê bibe pêta êgir, Lê wê Mala Esaw bibe pûş. Wê bişewitînin û biqedînin, Wê ji Mala Esaw kesek nemîne.» Çimkî Xudan wiha gotiye.

¹⁹Gelê Negevê wê çiyayên Esaw, Gelê Şefêlayê[3] wê welatê Filîstiyan ji xwe re bike milk. Cihûdayî wê axa Efrayîmê û axa Sameryayê, Binyamînî jî wê Gîladê ji xwe re bikin milk.

²⁰Leşkerên Îsraîlî yên ji Kenanê hatine sirgûnkirin, Wê axa heta Sarêfatê, Sirgûnên Orşelîmî yên li Sefaradê, Wê bajarên li Negevê ji xwe re bikin milk.

²¹Wê rizgarkarên gel herin Çiyayê Siyonê Ku serweriya çiyayên Esaw bikin Û padîşahî bibe ya Xudan.