Read Kurmanji Încîl Ûnis 1 Bible Online

Ûnis 1 - Kurmanji Încîl bible

Ûnis 1

¹Rojeke peyva Xudan ji Ûnisê kurê Amîttay re hat û got:

²«Rabe, here Nînowayê, wî bajarê mezin. Li dijî wî dengê xwe bilind bike. Çimkî xerabiya wan gihîşt heta ba min.»

³Lê belê Ûnis ji ber Xudan reviya ku here Tarşîşê. Ew daket Yafayê û gemiyeke ku diçe Tarşîşê dît; heqê riya xwe da û ket gemiyê ku bi wan re here Tarşîşê û ji Xudan dûr bikeve.

⁴Xudan bagerek mezin bi ser deryayê ve şand. Di deryayê de bahozeke wisa mezin rabû ku hindik mabû gemî perçe perçe bibe.

⁵Deryavan tirsiyan û her yekî ji îlahê xwe re kir hewar. Ji bo ku barê gemiyê sivik bikin tiştên tê de avêtin deryayê. Lê Ûnis daketibû embara gemiyê, razabû û ketibû xeweke giran.

⁶Serwerê gemiyê hat ba Ûnis û jê re got: «Ev çi razan e! Rabe, ji îlahê xwe re bike hewar! Belkî me bîne bîra xwe û em helak nebin.»

⁷Piştre deryavanan ji hev re got: «Werin em pişkê bavêjin û hîn bibin ka gelo kê ev bela aniye serê me.» Wan pişk avêt û li Ûnis ket.

⁸Jê re gotin: «Ka ji me re bêje, kî ye sedema vê belayê! Tu çi karî dikî? Ji ku derê têyî? Welatê te ku der e? Tu ji kîjan miletî yî?»

⁹Ûnis ji wan re got: «Ez Îbranî me, ez diperizim Xudan,[1] Xwedayê Ezmanan ê ku bejahî û derya afirandiye.»

¹⁰Paşê zilam bêtir tirsiyan û jê re gotin: «Ev karê ku te kir çi ye?» Çimkî wan dizanibû ku ew ji ber Xudan direve, ji ber ku wî berê ji wan re gotibû.

¹¹Wan jê re got: «Ji bo ku derya bisekine û aram be, em çi ji te bikin?» Çimkî her ku diçû pêlên deryayê har dibûn.

¹²Ûnis ji wan re got: «Min bavêjin deryayê. Paşê wê derya ji bo we aram bibe; ji ber ku ez dizanim ev bahoza mezin ji ber min hat serê we.»

¹³Deryavan, ji bo ku bigihîjin bejahiyê, zor dan bêrikan. Lê belê bi ser neketin, ji ber ku her diçû pêlên deryayê bilindtir dibûn.

¹⁴Gazî Xudan kirin û gotin: «Ya Xudan, em ji te lava dikin, nehêle ku em ji ber vî mirovî helak bibin. Gunehê wî nexe stûyê me. Ya Xudan, te çawa xwest wisa jî kir.»

¹⁵Rabûn, Ûnis avêtin deryayê. Li ser vê yekê derya aram bû.

¹⁶Deryavan gelekî ji Xudan tirsiyan û jê re qurban pêşkêş kir û soz ji Xudan re dan.

¹⁷Xudan masiyekî mezin şand ku Ûnis daqurtîne. Ûnis sê roj û sê şevan di zikê masiyê mezin de ma.