Read Kurmanji Încîl Nahûm 1 Bible Online

Nahûm 1 - Kurmanji Încîl bible

Nahûm 1

¹Peyama li dijî Nînowayê. Nivîsa dîtinî ya Nahûmê Elqoşî.

²Xudan, Xwedayekî xîretkêş[1] e û heyfê hiltîne, Xudan heyfê hiltîne û tije xezeb e. Xudan heyfa xwe ji neyarên xwe distîne Û kîndarê dijminê xwe ye.

³Xudan zû hêrs nabe, Lê di hêzê de mezin e. Ew sûcdaran esse bêceza nahêle. Riya Xudan di bager û bahozê de ye Û ewr toza piyê wî ye.

⁴Erzê deryayê dişikêne û wê ziwa dike, Ava hemû çeman ziwa dike. Başan û Karmel diçilmisin, Kulîlka Lubnanê jî diçilmise.

⁵Li ber wî çiya dihejin û gir dihelin, Li pêşberî wî, ji cihê xwe rûyê erdê dilebitin, Dinya û her kesê tê de jî.

⁶Kî dikare li ber xezeba wî bisekine? Kî dikare li ber hêrsa wî xwe ragire? Hêrsbûna wî wekî êgir dirije Û bi destê wî zinar perçe dibin.

⁷Xudan qenc e, Di roja teng de sitargeh e, Kesên xwe dispêrinê, diparêze.

⁸Lê wê warê Nînowayê bi lehiyan bi tevahî xerab bike Û wê dijminên xwe ber bi tariyê ve biqewirîne.

⁹Çima hûn li dijî Xudan şêwra xerabiyê dikin? Wê bi tevahî xerab bike Û tengasî careke din serî hilnede.

¹⁰Wekî stiriyan li hev pêçayî, Wekî vexwariyan serxweş bûn, Wekî kayê ziwa, ew bi tevahî daqurtandin.

¹¹Nînowa! Ji te şêwirmendê beredayî derket Ku li dijî Xudan xerabî dike.

¹²Xudan wiha dibêje: «Tevî ku ew hêzdar û zêde ne jî, Wê wekî hiriyê bên birîn, Wê derbas bibin û nemînin. Ya gelê min! Min tu nizim kiribe jî, Ezê careke din te nizim nekim.

¹³Niha ezê nîrê wî yê li ser te bişikênim, Ezê benên te bibirim.»

¹⁴Nînowa! Xudan fermana te daye! «Wê li ser navê te tu ziriyet ranebe. Ezê ji mala îlahên te Pûtên te yên rijandî rakim û bavêjim. Ezê gora te çêkim, çimkî tu hatî nizimkirin.»

¹⁵Va ye, lingê mizgînvan ku aştiyê dide bihîstin, Li ser çiyê ye! Cihûdayîno! Cejnên xwe bikin, Sozên xwe yên ji Xwedê re pêk bînin. Çimkî wê careke din di nav we re zilamên xerab derbas nebin. Ew bi tevahî hatine birîn û avêtin.