Read Kurmanji Încîl Habaqûq 1 Bible Online

Habaqûq 1 - Kurmanji Încîl bible

Habaqûq 1

¹Peyama ku bi riya dîtiniyê ji Habaqûqê Pêxember re hat.

²Ya Xudan, heta kengê ezê li te bikim hewar Û tê min nebihîzî? Ez ji te re diqîrim û dibêjim: «Zordarî heye!» Lê tu rizgar nakî!

³Tu çima ewqas xerabiyê nîşanî min didî? Tu çima li ber ewqas neheqiyê xemsar î? Ez li ku dinêrim, xerakirin û zordarî heye. Pevçûn û berberî zêde dibe.

⁴Loma hêza Şerîetê nemaye, Edalet qet pêk nayê. Xerab rastan dorpêç dikin, Jixwe edalet jî tuneye.

⁵«Li miletan binêrin! Şaş û metel bimînin! Çimkî ezê di rojên we de tiştekî wisa bikim, Gava bê gotin, hûnê bawer nekin.

⁶Ez Kildaniyan xurt dikim, Ew miletekî bêrehm û êrîşkar in. Dibezin tevahiya dinyayê, Warên ne yê wan e bi dest dixin.

⁷Erjeng û tirsdar in, Rê û rêbazên xwe ew çêdikin, Li pey navê xwe ne.

⁸Hespên wan ji pilingan lezgîntir in, Ji gurên êvarê çalaktir in. Siwarên wan ji dûrî ve bi çargavî tên, Wekî teyr difirin, xwe davêjin ser nêçîrê.

⁹Hemû ji bo zordariyê tên. Wek bayê beriyê pêş ve diçin, Wek sêlakê êsîran kom dikin.

¹⁰Tinazan bi padîşahan dikin, Henekan bi mîran dikin. Bi her kelehê dikenin, Axê li ber kom dikin û desteser dikin.

¹¹Paşê wek bayê tên û diçin. Ew sûcdar in, Hêza wan îlahê wan e.»

¹²Ma yê ji herheyiyê ne tu yî, Ya Xudan, Xwedayê min ê pîroz? Tê nemirî[1]. Ya Xudan, ji bo dîwana me te Kildanî hilbijartin? Ya zinarê me, ji bo cezayê me te ew diyar kirin?

¹³Çavên te ewqas paqij in ku Li xerabiyê nanêrin. Tu nikarî neheqiyê ragirî. Tu çima li xayînan dinêrî? Gava xerab kesên ji xwe rastir dadiqurtînin, Tu çima bêdeng dimînî?

¹⁴Te mirov kirine wek masiyên deryayan, Wek afirîdên dişêlin bê serwer in.

¹⁵Kildanî wan hemûyan bi şewkê derdixin. Bi torebenên xwe wan digirin, Bi torên xwe yên mezin berhev dikin. Ew şa û kêfxweş dibin.

¹⁶Loma ji bo torên xwe qurbanan serjê dikin, Ji torên xwe yên mezin bixûrê pêdixin. Çimkî bi wan para wan gelek e, Xwarina wan zêde ye.

¹⁷Ma wê bi berdewamî torên xwe vala bikin? Ma wê bi bêrehmî hemû miletan tune bikin?