Read Kurmanji Încîl Habaqûq 3 Bible Online

Habaqûq 3 - Kurmanji Încîl bible

Habaqûq 3

¹Duaya Habaqûqê Pêxember, bi Şîgyonotê[5]:

²Ya Xudan, min nav û dengê te bihîst. Ya Xudan, li ber kirinên te ez şaş û metel mam. Di dema me de jî wan tiştan bike, Di dema me de jî wan bide zanîn. Lê çaxê tu hêrs dibî, dilovaniya xwe jî bi bîr bîne.

³Xwedê ji Têmanê, Xwedayê Pîroz ji Çiyayê Paranê hat. Sela [6] Rewnaqiya wî ezmanan rapêçaye, Erd bi pesindana wî tije bû.

⁴Biriqîna wî wek ronahiya rojê ye. Tîrêj ji destê wî dertên, Destê ku hêza wî tê de veşartî ye.

⁵Kul li pêş wî diçe, Êşa mirinê li pey wî ye.

⁶Ew sekinî û erd hejand, Bi awira xwe milet lerizandin. Çiyayên qedîm tarûmar bûn, Girên herheyî tewiyan, Riyên Xwedê qet naguherin.

⁷Min konên Kûşanê di tengasiyê de dîtin, Perdeyên çadirên Mîdyanê dilerizîn.

⁸Ya Xudan, ma tu ji çeman hêrs bûyî? Xezeba te ji bo rûbaran e? Çaxê tu li hespên xwe, Li erebeyên xwe yên rizgariyê siwar bûyî, Ma xezeba te li dijî deryayan bû?

⁹Te rahişt kevanê xwe, Tîrdanka xwe hilda. Sela Te rûyê erdê bi çeman ji hev veqetand.

¹⁰Bi dîtina te çiya hejiyan, Lehî rabûn û her tişt dan ber xwe. Kûrahiya deryayê kir xuşîn, Pêl bilind bûn.

¹¹Ji ber biriqîna tîrên te yên hildifirin, Ji ber şewqa rima te ya dibiriqe, Roj û heyv li cihên xwe sekinîn.

¹²Tu bi hêrs li ser rûyê erdê meşiyayî, Te miletan bi xezeba xwe perçiqand û şikandin.

¹³Ji bo tu gelê xwe xilas bikî, Ji bo tu yê diyarkirî xilas bikî rabûyî. Te serê mala kesê xerab pelişand, Ji serî heta binî hilweşand. Sela

¹⁴Leşkerên wî wek bahozê hatin ku me tarûmar bikin, Bi hewes hatin ku hejarên veşartî daqurtînin, Lê te serên leşkerên kesê xerab bi rimên wan qul kirin.

¹⁵Te bi hespên xwe li deryayê xist, Pêlên wê bilind kirin.

¹⁶Min bihîst û dilê min lê da, Ji gurmînê lêvên min ricifîn, Rizîbûn ket hestiyên min. Çokên min lerizîn. Lê ezê bi sebir li benda wê rojê bim Ku bibe felaketa gelê êrîşî me kir.

¹⁷Heger darhejîr kulîlk nedin, Bi mêwan ve tirî tunebe, Darzeytûn berê xwe nedin, Zevî dexil nedin, Hevşî ji pez vala bibin Û di axuran de dewar nemînin,

¹⁸Ezê dîsa jî bi Xudan şa bibim, Ezê bi Xwedayê xilasiya xwe bicoşim.

¹⁹Reb Xudan hêza min e. Ew lingên min dike wekî lingên xezalan, Min li bilindciyan digerîne. Ji bo serkarê sazbend û stranbêjan, bi sazan.