Read Kurmanji Încîl Sefanya 1 Bible Online

Sefanya 1 - Kurmanji Încîl bible

Sefanya 1

¹Peyva Xudan a ku di rojên Yoşiyayê kurê Amonê Padîşahê Cihûdayê de, ji Sefanyayê kurê Kûşiyê kurê Gedalyayê kurê Amaryayê kurê Hîzqiya re hatiye, ev e:

²«Ezê her tiştî ji ser rûyê erdê rakim.» Ev e gotina Xudan.

³«Ezê mirov û heywanan rakim, Ezê teyrên ezmanan û masiyên deryayan, Zilamên xerab û dafikên wan ên gunehan rakim. Ezê ji ser rûyê erdê mirovan helak bikim.» Ev e gotina Xudan.

⁴«Ezê destê xwe li dijî Cihûdayê, Li dijî tevahiya rûniştiyên Orşelîmê dirêj bikim. Ezê ji vê derê, Bermayiyên ji Baal, Navê pûtperest û kahinên pûtan,

⁵Kesên li ser banan Ji nexşên ezmanan re diçin ser çokan, Kesên diçin ser çokan Û hem bi navê Xudan, Hem jî bi navê Molek[1] sond dixwin,

⁶Kesên ji riya Xudan averê dikin, Li Xudan venagerin Û pirsa wî nakin, helak bikim.

⁷Li ber Reb Xudan hiş be! Çimkî roja Xudan nêzîk e. Xudan qurbanekê amade kir, Vexwendiyên xwe pîroz kir.

⁸Di roja qurbana Xudan de, Ezê tevahiya serekan û kurên padîşah, Tevî hemû kesên li gorî kevneşopiyên xerîban diçin[2] ceza bikim.

⁹Wê rojê ezê hemû pûtperestên[3] Ku bi zordarî û hîleyan Malên îlahên xwe dadigirin ceza bikim.»

¹⁰Gotina Xudan ev e: «Wê rojê ji Dergehê Masiyan hewar, Ji Taxa Duyemîn zarîn Û ji giran wê dengê şikestina mezin were.

¹¹Ya rûniştiyên Maktêşê[4] bikin zarîn! Çimkî wê hemû tacir tune bibin, Hemû kesên barê wan zîv e, helak bibin.

¹²Wê rojê, ezê bi qendîlan li Orşelîmê bigerim. Ezê zilamên ehlê kêfê[5] Ku di dilê xwe de dibêjin: ‹Xudan başiyê jî nake, Xerabiyê jî nake› ceza bikim.

¹³Wê serweta wan talan, Malên wan wêran bibe. Wê malan ava bikin, Lê wê tê de rûnenên. Wê rezan deynin, Lê wê ji şeraba wê venexwin.»

¹⁴Roja mezin a Xudan nêzîk e, Nêzîk e û pir bi lez tê. Dengê roja Xudan tehl e, Egîd jî wê li wê derê binale.

¹⁵Ev roj, roja xezebê ye. Roja teng û derdê, Roja helakbûn û wêraniyê ye. Roja tarî û taristanê, Roja ewran û tariya kûr e.

¹⁶Roja borîlêxistin û qîrînên Li dijî bajarên bisûr Û li dijî bircên bilind e.

¹⁷«Ezê tengasiyê bînim ser mirovan Û wê wek koran bimeşin. Çimkî li dijî Xudan guneh kirin. Wê xwîna wan wek tozê, Goştê wan wek ziblê bê rijandin.»

¹⁸Wê di roja xezeba Xudan de Zîvên wan jî, zêrên wan jî Wê nikaribe wan rizgar bike. Di agirê xîreta Xudan de Wê tevahiya welêt bê daqurtandin. Çimkî wê hemû rûniştiyên welêt ber bi dawiyê, Ber bi dawiyeke tirs û sawê ve bibe.