Read Kurmanji Încîl Sefanya 3 Bible Online

Sefanya 3 - Kurmanji Încîl bible

Sefanya 3

¹Wey li wî bajarê serhildêr, pîs û zordar!

²Guh neda, şîret nestand. Bi Xudan ewle nebû, Nêzîkî Xwedayê xwe nebû.

³Serwerên bajêr wekî şêran digurmijin, Serekên wî gurên êvaran in. Heta serê sibê tiştekî nahêlin.

⁴Pêxemberên bajêr bêserûber û xayîn in. Kahinên wî Pîrozgeh herimand, Zorê li Şerîetê kir.

⁵Xudanê tê de rast e, Ew neheqiyê nake. Ew her sibe edaleta xwe pêk tîne Û her şeveq wê bernade. Lê kesê neheq nizane şerm çi ye.

⁶Xudan dibêje: «Min milet helak kirin, Bircên wan wêran bûn. Min kuçeyên wan xerab kirin, Tu kes tê re derbas nabe. Bajarên wan helak bûn, Kesek nema, rûniştî tuneye.

⁷Min di dilê xwe de got: ‹Wê gelê min esse ji min bitirse, Wê şîret bistîne. Wê malên te neyên tunekirin, Cezakirina min jî bi ser wan de neyê.› Dîsa jî ew zû rabûn ku Hemû karên xwe xerab bikin.»

⁸Li ser vê yekê gotina Xudan ev e: «Heta roja ku ezê rabim şahidiyê[7], Li benda min bin. Çimkî hikmê min ev e: Ezê miletan berhev bikim, Ezê padîşahiyan bidim hev Û xezeba xwe li ser wan, Tevahiya hêrsa xwe ya dijwar li ser wan birijînim. Çimkî tevahiya dinyayê Wê ji hêla agirê xîreta min ve bê daqurtandin.

⁹«Wî çaxî ezê lêvên miletan paqij bikim Ku hemû gazî navê Xudan bikin Û mil bi mil ji min re xizmetê bikin.

¹⁰Ji aliyê din ê çemên Kûşê, Wê kesên diperizin min. Gelê min ê belavbûyî, Pêşkêşiyan ji min re bînin.

¹¹Tê wê rojê ji ber tevahiya karên xwe Yên te li dijî min kirine, şerm nekî. Çimkî ezê kesên bi pozbilindiyê şahiyê dikin, Wê gavê ji nav te rakim. Êdî tê careke din Li çiyayê min ê pîroz qure nebî.

¹²Lê ezê di nav te de Gelekî belengaz û nefsbiçûk[8] bihêlim Û wê xwe bispêrin navê Xudan.

¹³Bermayiyên Îsraîl wê neheqiyê nekin. Wê derewan nekin, Di devê wan de Wê zimanekî hîlekar tunebe. Wê biçêrin û razên Û wê tu kes wan netirsîne.»

¹⁴Ya keça Siyonê, stranan bêje! Ya Îsraîl, bi kêf biqîre! Bi hemû dilê xwe kêfxweş be! Keça Orşelîmê, şahî bike!

¹⁵Xudan cezayên te rakirin, Dijminên te qewirandin. Xudanê Padîşahê Îsraîl, Di nav te de ye, Êdî tê ji xerabiyê netirsî.

¹⁶Wê rojê wê ji Orşelîmê re bê gotin: «Ya Siyon netirse! Bila sist nebin destên te.

¹⁷Xwedayê te Xudan Rizgarkarekî hêzdar e Û di nav te de ye! Wê ji bo te şa û kêfxweş bibe. Wê bi hezkirina xwe te nû bike[9], Ji bo te wê bi stranan dilgeş bibe.

¹⁸Ezê hesreta ji bo cejnan Ji nav te rakim. Ew ji bo te bar û riswatî ye.

¹⁹Va ye, ezê wî çaxî belaya xwe bidim Hemû kesên ku li te eziyet kirin. Ezê kesê kulek rizgar bikim, Kesên sirgûnbûyî berhev bikim. Ezê şerma wan bikim Pesin û navdarî û li seranserê dinyayê belav bikim.

²⁰«Gava min hûn berhev kirin Ezê dîsa we bînim malê. Gava min di çavên we de Hûn vegerandin firehiya we ya berê, Ezê navdarî û pesnê bidim we Ku di nav hemû gelên dinyayê de hebe» Xudan dibêje.