Read Kurmanji Încîl Hagay 1 Bible Online

Hagay 1 - Kurmanji Încîl bible

Hagay 1

¹Di sala diduyan a padîşahiya Daryûs de, di roja pêşî ya meha şeşan de, peyva Xudan bi riya Hagayê Pêxember, ji Zerûbbabîlê kurê Şealtiyêlê Waliyê Cihûdayê û Yêşûyê Serkahinê kurê Yehosadaq re hat û got:

²«Xudanê Karîndar wiha dibêje: ‹Li gorî gel dibêje, dema jinûvelêkirina Mala Xudan hê nehatiye.›»

³Li ser vê yekê peyva Xudan bi riya Hagayê Pêxember hat û got:

⁴«Ev Mal hê jî xerabe ye, lê hûn çawa di malên darkiraskirî de rûdinin?»

⁵Xudanê Karîndar wiha dibêje: «Baş li riyên xwe bifikirin!

⁶We gelek tov reşand, lê we kêm da hev. Xwarina we heye, lê têrxwarina we tuneye! Hûn dinoşin, lê nacoşin. Hûn li xwe dikin, lê germ nabin. Hûn heqdestê xwe distînin, lê dixin kîsikê qul.»

⁷Xudanê Karîndar wiha dibêje: «Baş li riyên xwe bifikirin!

⁸Rabin derkevin serê giran, daran bînin û Malê ji nû ve ava bikin. Wisa çêkin ku Mal bi dilê min be û pê rûmetdar bibim» dibêje Xudan.

⁹«Hûn li hêviya dexla zêde bûn, lê hindik pêk hat. We çi anî mala xwe, min da ber bayê.» Ev e gotina Xudanê Karîndar. «Gelo çima? Çimkî Mala min hê xerabe ye, lê xema we tenê mala we ye.

¹⁰Ji ber vê yekê ezman xunava xwe, erd berê xwe nade we.

¹¹Min hişkesalî şand ser welat û çiyayên wî; ser dexil, şeraba nû, rûnê zeytê, berên axê, mirov û heywanên wî û ser tevahiya keda destên we.»

¹²Zerûbbabîlê kurê Şealtiyêl, Yêşûyê Serkahinê kurê Yehosadaq û tevahiya gelê ji sirgûnê vegeriya guh da dengê Xwedayê xwe Xudan û gotinên Hagayê Pêxemberê ku Xwedayê wan Xudan şandibû. Gel ji Xudan tirsiya.

¹³Paşê Hagayê qasidê Xudan, ev gotina Xudan ji gel re got: «‹Ez bi we re me.› Ev e gotina Xudan.»

¹⁴Bi vî awayî Xudan ruhê Zerûbbabîlê kurê Şealtiyêlê Waliyê Cihûdayê, ruhê Yêşûyê Serkahinê kurê Yehosadaq û ruhê tevahiya gelê ji sirgûnê vegeriya hişyar kirin. Piştre ew hatin û di Mala Xudanê Karîndarê Xwedayê xwe de dest bi xebatê kirin.

¹⁵Ev bûyer di roja bîst û çarê meha şeşan a sala diduyan a padîşahiya Daryûs de pêk hat.