Read Kurmanji Încîl Zekeriya 11 Bible Online

Zekeriya 11 - Kurmanji Încîl bible

Zekeriya 11

¹Ya Lubnan! Dergehên xwe veke Ku agir darên te yên sedrê bixwe!

²Ya dara çamê, bike zarîn! Dara sedrê ketiye, Darên spehî xera bûn. Darmaziyên Başanê, bikin zarîn! Çimkî daristanên gur tewiyan.

³Zarîna şivanan tê! Çimkî mêrgên wan ên spehî xera bûn! Gurmijîna şêrên ciwan tê! Çimkî xera bû daristanên spehî yên li keviya Çemê Şerîayê.

⁴Xwedayê min Xudan wiha dibêje: «Pezên ji bo serjêkirinê hatine veqetandin biçêrîne.

⁵Kesên pez kirîne serjê dikin lê cezayê xwe nakişînin. Kesên pez firotine jî dibêjin: ‹Şikir ji Xwedê re, va ye ez dewlemend bûm!› Şivanên wan li ber wan nakevin.

⁶Çimkî ezê êdî li ber rûniştiyên welêt nekevim.» Ev e gotina Xudan. «Ezê her kesî bidim destê cîranê wî û padîşahê wî. Wê welêt biperçiqînin, ezê jî tu kesî ji destê wan rizgar nekim.»

⁷Loma min pezên ji bo serjêkirinê hatine veqetandin, bi taybetî yên bindest, çêrandin. Min du gopal dan destê xwe. Min ji yekê re got: «Kerem.» Ji ya din re got: «Yekîtî.» Bi vî awayî min pez çêrandin.

⁸Di nava mehekê de min sê şivan ji ser û guhên xwe avêtin. Çimkî hîlê min ji pêz çûbû, pez jî ji min nefret kir.

⁹Min ji pêz re got: «Ezê êdî we neçêrînim. Yên bimirin bila bimirin, yên davêjin bila bavêjin, yên mayîn jî bila goştê hev bixwin.»

¹⁰Min rahişt darê xwe yê bi navê «Kerem» û ew şikand. Bi vî awayî ez peymana ku min bi tevahiya gelan re kiriye xera dikim.

¹¹Loma wê rojê peyman xerab bû. Bindestên pêz ku çav û guhên wan li min bûn, fêm kir ku ew peyva Xudan bû.

¹²Min ji wan re got: «Heger bi dilê we be, min bidin, an na dev jê berdin.» Loma wan sî zîv ji bo heqê min pîvan.

¹³Xudan ji min re got: «Wan bavêje ber cerçêker[14]» yanî wê heqê zêde ku wekî bihayê min diyar kirine. Li ser vê yekê min sî zîv hilda û avêt ber cerçêkerê Mala Xudan.

¹⁴Paşê min darê xwe yê din ê bi navê «Yekîtî» şikand. Bi vî awayî biratiya di navbera Cihûda û Îsraîlê de xerab dikim.

¹⁵Xudan ji min re got: «Tu dîsa tiştên şivanekî ehmeq hilde.

¹⁶Ezê şivanekî wisa li ser welêt bikim serwer ku wê haya wî ji avêtiyan tunebe. Wê li yên ji hev belav bûne[15] negere. Wê birîndaran baş neke û saxleman têr neke. Bi tenê wê goştê pezên dermalekirî bixwe, simên wan jî bikişîne.

¹⁷«Wey li şivanê min ê beredayî ku pêz diterikîne! Bila şûr li milê wî û çavê wî yê rastê bixe! Bila milê wî ji binî ve hişk bibe, Çavê wî yê rastê jî bi tevahî kor bibe!»