Read Kurmanji Încîl Zekeriya 12 Bible Online

Zekeriya 12 - Kurmanji Încîl bible

Zekeriya 12

¹Peyam: Peyva Xudan a li ser gelê Îsraîl ev e. Xudanê ku ezman tikandin, bingeha rûyê erdê danî û şikil da ruhê di nava mirovan de, wiha dibêje:

²«Va ye, ezê Orşelîmê bikim tasikeke sersemiya tevahiya gelên li derdorê. Wekî Orşelîmê, wê Cihûda jî bê dorpêçkirin.

³Wê rojê ezê Orşelîmê ji bo hemû miletan bikim kevirekî giran. Her kesê rake, wê bi awayekî xedar birîndar bibe. Wê hemû miletên dinyayê, li dijî Orşelîmê bibin yek.»

⁴Gotina Xudan ev e: «Wê rojê ezê her hespî bixim nava sawê, her siwariyî dîn û har bikim. Wê çavê min li ser Mala Cihûda be lê ezê hemû hespên gelan kor bikim.

⁵Wê mîrên Cihûdayê di dilê xwe de wiha bêjin: ‹Rûniştiyên Orşelîmê ku bi Xwedayê xwe Xudanê Karîndar ewle ne, ji bo me kaniya hêzê ne.›

⁶«Wê rojê ezê mîrên Cihûdayê bikim wekî tasikeke nava agirê daran û xetîreyeke di nav lodên genim de dişewite. Wê tevahiya gelên li rast û çepê daqurtînin. Wê rûniştiyên Orşelîmê êdî li cihê xwe, li Orşelîmê rûnin.

⁷«Wê Xudan pêşî konên Cihûdayê rizgar bike ku berziya Mala Dawid û rûniştiyên Orşelîmê, ji Cihûdayê mezintir nebe.

⁸Wê rojê wê Xudan rûniştiyên Orşelîmê biparêze. Wê rojê wê kesê di nav wan de herî sist, wekî Dawid be. Mala Dawid jî wekî Xwedê be, wekî milyaketê Xudan be ku li pêşiya wan be.

⁹Wê rojê ezê hemû miletan tune bikim ku rabûne û êrîşî Orşelîmê dikin.

¹⁰«Ezê ruhê kerem û lavakirinê birijînim ser Mala Dawid û rûniştiyên Orşelîmê ku li min, li yê ku wan qul kirine binêrin. Wê mîna kesekî ku şîna kurê xwe yê tenê dike, şînê bikin. Wekî kesê ku ji bo kurê xwe yê pêşî êşê dikişîne, wê êşê bikişînin.

¹¹Wê rojê şîna ku li Orşelîmê tê kirin, wê mîna şîna li Hadad-Rîmmona Deşta Megîddoyê, mezin be.

¹²Wê li welêt, her binemal, di nav xwe de şînê bike. Wê binemala Dawid di nav xwe de, jinên wan di nav xwe de, binemala Natan di nav xwe de, jinên wan di nav xwe de,

¹³binemala Lêwî di nav xwe de, jinên wan di nav xwe de, binemala Şîmî di nav xwe de, jinên wan di nav xwe de,

¹⁴hemû binemalên din di nav xwe de û jinên wan jî di nav xwe de şînê bikin.»