Read Kurmanji Încîl Zekeriya 2 Bible Online

Zekeriya 2 - Kurmanji Încîl bible

Zekeriya 2

¹Min serê xwe rakir û nihêrî. Min kesek dît ku di destê wî de benikê pîvanê hebû.

²Min jê pirsî: «Tu diçî ku?» Wî got: «Ez diçim Orşelîmê ku bizanibim berfirehî û dirêjahiya wê çiqas e.»

³Milyaketê ku bi min re peyivî ji ba min rabû çû. Yekî din jî rabû ku pêşwaziya wî bike

⁴û got: «Bazde, ji wî xortî re bêje: ‹Ji ber zêdebûna mirov û heywanên ku tê de bijîn, wê Orşelîm bibe bajarekî bêsûr.

⁵Gotina Xudan ev e: Ezê bixwe ji çermedorê wê re bibim dîwarekî ji êgir û di nav de jî bibim rûmet.›»

⁶Gotina Xudan ev e: «Rabin, rabin! Ji diyarê bakur birevin. Ji ber ku min hûn li çar aliyên ezmanan belav kirin.» Ev e gotina Xudan.

⁷«Ya Siyona ku li Babîlê[1] dimîne! Bireve û rizgar bibe!»

⁸Çimkî Xudanê Karîndar ez birûmet kirim û şandim ku ji miletên hûn talan kirine re bibêjim: «Kesê ku dest bide we, wê dest bide bîbika çavê min[2].

⁹Ezê destên xwe li dijî wan rakim û wê bibin talanê xulamên xwe.» Wê gavê hûnê bizanin ku Xudanê Karîndar ez şandime.

¹⁰«Ya Siyona keç, ji kêfan biqîre! Şa be! Çimkî va ye ez têm û ezê di nav te de rûnim.» Ev e gotina Xudan.

¹¹«Wê rojê wê gelek milet bi Xudan ve bên girêdan. Wê bibin gelê min. Ezê di nav te de rûnim.» Tê bizanî ku Xudanê Karîndar ez şandime ba te.

¹²Wê wekî para xwe, Xudan di nava axa pîroz de, Cihûdayê ji xwe re bike mîras û dîsa Orşelîmê hilbijêre.

¹³Hemû beşer, li ber Xudan hiş bin! Ji ber ku ew ji cihê xwe yê pîroz rabû û tê.