Read Kurmanji Încîl Zekeriya 4 Bible Online

Zekeriya 4 - Kurmanji Încîl bible

Zekeriya 4

¹Milyaketê ku bi min re dipeyivî dîsa vegeriya û mîna kesekî ku ji xewê hişyar bike, ez hişyar kirim.

²Ji min re got: «Tu çi dibînî?» Min got: «Şamdankeke zêrê xas dibînim. Li ser wê taseke zeytê, li ser wê jî heft qendîl hene. Li ser qendîlan jî heft cihok hene.

³Li ba şamdankê du darzeytûn hebûn. Yek li rasta tasê, yek jî li çepa tasê bû.»

⁴Min ji milyaketê ku bi min re dipeyivî re got: «Ezbenî ev çi ne?»

⁵Wî got: «Ma tu nizanî ev çi ne?» Min got: «Na ezbenî.»

⁶Wî ji min re got: «Peyva Xudan a ji bo Zerûbbabîl ev e: ‹Wê ne bi hêz û qewetê lê bi Ruhê min be› dibêje Xudanê Karîndar.

⁷‹Ma tu kî yî, ya çiyayê mezin? Tê li ber Zerûbbabîl bibî deştek! Gava ew kevirê dawî yê banê Perestgehê bîne, wê biqîrin û bibêjin: Nûwaze! Nûwaze!›»

⁸Peyva Xudan ji min re hat û got:

⁹«Destên Zerûbbabîl bingeha vê malê danî. Wê destên wî jî wê temam bike.» Wê gavê hûnê bizanin ku Xudanê Karîndar ez şandime.

¹⁰Ma roja çêkirina tiştên biçûk kî kêm dibîne? Gava mirov di destê Zerûbbabîl de benikê pîvanê bibînin, wê şa bibin. Ew heft qendîl çavê Xudan in. Ew li seranserê dinyayê digerin.

¹¹Min ji milyaket re got: «Du darzeytûnên li aliyê rastê û çepê yê şamdankê çi ne?»

¹²Min berdewam kir û got: «Ev herdu guliyên zeytûnê yên li kêleka lûleyên zêrîn ku rûnê zêrîn[5] diherikînin, çi ne?»

¹³Wî ji min re got: «Tu nizanî ew çi ne?» Min got: «Na ezbenî.»

¹⁴Milyaket got: «Ev du kes in ku bi rûnê zeytê hatine kifşkirin û li hizûra Rebê hemû dinyayê disekinin.»