Read Kurmanji Încîl Zekeriya 6 Bible Online

Zekeriya 6 - Kurmanji Încîl bible

Zekeriya 6

¹Min careke din serê xwe rakir û nihêrî. Va ne ji nav du çiyayên tûncîn, çar erebeyên şer derketin û tên.

²Di erebeya pêşî de hespên sor, di ya diduyan de reş,

³di ya sisiyan de spî, di ya çaran de hespên belek hebûn. Her hesp xurt bû.

⁴Min ji milyaketê bi min re dipeyivî re got: «Ev çi ne ezbenî?»

⁵Milyaket got: «Ev çar ruhên ezmanan[10] in ku ji cihê xizmeta Rebê hemû dinyayê derketine.

⁶Erebeya ku hespên reş dikişîne ber bi bakur ve, erebeya hespên spî ber bi rojava ve, erebeya hespên belek jî ber bi başûr ve diçe.»

⁷Gava hespên xurt derketin, ew ji bo li ser dinyayê bigerin, dixwestin herin. Milyaket ji wan re got: «Herin li ser dinyayê bigerin.» Ew rabûn geriyan.

⁸Milyaket gazî min kir û got: «Binêre, yên ber bi bakur ve çûn, li wir hêrsa min kêm kir.»

⁹Peyva Xudan ji min re hat û got:

¹⁰«Ji kesên ji sirgûna Babîlê vegeriyane — ji Helday, Toviya û Yedaya — diyariyên wan bistîne û hema wê rojê here mala Yoşiyayê kurê Sefanya.

¹¹Ji zêr û zîvê te stand tacekê çêke û deyne serê Yêşûyê Serkahinê kurê Yehosadaq.

¹²Jê re bêje ku Xudanê Karîndar wiha dibêje: ‹Va ye mirovê bi navê gulî! Wê ji cihê xwe şax vede û Perestgeha Xudan ava bike.

¹³Belê, kesê Perestgeha Xudan ava bike ew e. Wê heşmet li ser be. Wê li ser textê xwe rûne û serweriyê bike. Wê kahin li ser textê xwe be. Herwiha wê di navbera herduyan de ahengek hebe.›

¹⁴Ji bo bîranîna Helday, Toviya, Yedaya û Yoşiyayê[11] kurê Sefanya, wê tac li Perestgeha Xudan were dayîn.

¹⁵Kesên dûr jî wê werin û ji bo avakirina Perestgeha Xudan kar bikin. Loma hûnê bizanibin ku Xudanê Karîndar ez şandime ba te. Heger hûn baş guhên xwe bidin dengê Xwedayê we Xudan, wê ev yek pêk bê.»