Read Kurmanji Încîl Zekeriya 7 Bible Online

Zekeriya 7 - Kurmanji Încîl bible

Zekeriya 7

¹Di roja çarê meha nehan — ku meha Kîslevê ye — a çarsaliya padîşahiya Daryûs de, peyva Xudan ji Zekeriya re hat.

²Gelê Bêt-Êlê, Sareser, Regem-Melek û mirovên wan şandin hizûra Xudan ku jê lava bikin

³û ji kahinên Mala Xudanê Karîndar û pêxemberan bipirsin: «Çawa ku me bi salan e dikir, di meha pêncan de em bigirîn û rojî bigirin?»

⁴Peyva Xudanê Karîndar ji min re hat û got:

⁵«Ji tevahiya gelê welêt û kahinan re bêje: ‹Gava we ji bo wan heftê salan, di meha pêncan û meha heftan de rojî digirt û şînê dikir, ma bi rastî we ji bo min kir?

⁶Ma we ji bo xwe nedixwar û venedixwar?

⁷Dema Orşelîm, bajarên derdora wê, Negev û Şefêla tije bûn û di firehiyê de bûn, ma peyvên ku Xudan bi riya pêxemberên berê gotibû ne ev bûn?›»

⁸Peyva Xudan ji Zekeriya re hat û got:

⁹«Xudanê Karîndar wiha dibêje: ‹Bi hikmên rast dîwanê bikin. Rehm û dilsozî nîşanî hev bidin.

¹⁰Zordariyê li jinebî, sêwî, xerîb û bindestan nekin. Di dilê xwe de ji hev re xerabiyan nekin.›

¹¹«Lê bav û kalên we nexwest guhdarî bikin. Bi serhişkî pişta xwe dan. Guhên xwe girtin ku nebihîzin.

¹²Wan dilê xwe mîna keviran hişk kirin ku guhdariya Şerîet û gotinên Xudanê Karîndar nekin ku bi Ruhê xwe, bi riya pêxemberên berê şandine. Loma Xudanê Karîndar bi xezeba dijwar hêrs bû.

¹³«Xudanê Karîndar dibêje: ‹Gava min gazî wan dikir, wan guh neda min. Loma gava ew gazî min bikin, ezê jî guh nedim wan.

¹⁴Min ew wekî bahozê avêtin nav tevahiya miletên nenas. Wan welat hişt, loma bû wêrane ku kesek here û lê bimîne nema. Welatê xweş bû wêrane.›»