Read Kurmanji Încîl Lûqa 3 Bible Online

Lûqa 3 - Kurmanji Încîl bible

Lûqa 3

¹Di sala panzdehan a padîşahiya Qeyser Tîberyos de Pontiyos Pîlatos waliyê Cihûstanê bû, Hêrodês serwerê Celîlê bû, birayê wî Filîpos serwerê herêma Îtûrya û Traxonîdayê bû, Lûsanyas serdarê Avêlinyayê bû

²û Henan û Qeyafa Serokkahîn bûn. Di wê demê de gotina Xwedê li çolê ji Yûhennayê kurê Zekerya re hat.

³Îcar Yûhenna çû û li seranserê Çemê Urdunê hîn dikir, ku xelk imad bibin û tobe bikin, da ku li gunehên wan bê bihûrtin.

⁴Çawa ku di kitêba gotinên Îşaya pêxember de hatiye nivîsîn: «Dengê yê li çolê bang dike: ‹Riya Xudan amade bikin Şiveriyên wî sererast bikin!

⁵Her gelî wê tije bibin, Her çiya û gir wê nizim bibin, Xwarî wê rast bibin Û riyên asê wê hilû bibin.

⁶Û her mirov wê xilasiya Xwedê bibîne.›»

⁷Îcar elalet dihatin, da ku ji aliyê Yûhenna ve bên imadkirin. Wî ji wan re got: «Hey têjikên koremaran, kê ji we re gotiye ku hûn ji ber wê xezeba ku tê, birevin?

⁸De ka fêkiyê ku li tobekirinê tê, bidin û dest pê nekin û ji xwe re nebêjin: ‹Birahîm bavê me ye.› Ez ji we re dibêjim ku Xwedê dikare ji van keviran jî zarokan ji Birahîm re rake.

⁹Ji xwe bivir li ser qurmê daran e. Her dara ku berê qenc nede, wê bê birrîn û bê avêtin nav êgir.»

¹⁰Û elaletê ji wî pirsî û got: «Nexwe em çi bikin?»

¹¹Wî li wan vegerand û got: «Yê ku du kirasên wî hebin, bila yekî bide wî yê ku tune û yê ku xwarina wî hebe, bila ew jî wisa bike.»

¹²Bacgir jî hatin, da ku imad bibin û gotin: «Mamoste, ma em çi bikin?»

¹³Wî ji wan re got: «Ji wî tiştê ku divê hûn bistînin bêtir nestînin.»

¹⁴Leşkeran jî pirsî û gotin: «Lê em çi bikin?» Û wî ji wan re got: «Bêbextiyê li xelkê nekin û bi darê zorê tiştekî ji wan nestînin û bi meaşê xwe razî bin.»

¹⁵Ew xelk hemû di hêviyê de dima û li ser Yûhenna di dilê xwe de digotin: «Ma gelo Mesîh ev e?»

¹⁶Û Yûhenna bersîva wan da û got: «Ez bi avê we imad dikim, lê yê ji min hêzdartir tê, ku ez ne hêja me, benên çaroxa wî jî vekim. Ewê bi Ruhê Pîroz û bi êgir we imad bike.

¹⁷Melhêba wî di destê wî de ye, da ku bêndera xwe paqij bike û genim di embara xwe de bicivîne, lê ewê kayê bi agirê ku venamire bişewitîne.»

¹⁸Bi vî awayî wî bi gelek tiştên din jî şîret li xelkê dikir û Mizgînî bi wan dida bihîstin.

¹⁹Lê gava Yûhenna ji ber jinbira Mîr Hêrodês Hêrodiya û ji ber hemû xerabiyên din, yên ku wî kiribûn, li wî hilat,

²⁰Hêrodês li ser hemû xerabiyên xwe ev jî bi ser de zêde kir, ku wî Yûhenna avêt zîndanê.

²¹Gava xelk hemû dihat imadkirin, Îsa jî imad bû. Wê kêlîka ku Îsa dua dikir, ezman vebû

²²û Ruhê Pîroz bi beden di şiklê kevokekê de li ser wî danî û dengek ji ezmên hat û got: «Tu yî Kurê min ê delal. Dilê min bi te xweş e.»

²³Îsa bi xwe, gava ku dest bi hînkirina xwe kir, nêzîkî sî salî bû. Û wek ku dihat gumankirin ew kurê Ûsiv bû, kurê Elî,

²⁴kurê Metat, kurê Lêwî, kurê Melkê, kurê Yannay, kurê Ûsiv,

²⁵kurê Metîtya, kurê Amos, kurê Nahûm, kurê Heslî, kurê Necay,

²⁶kurê Mehat, kurê Metîtya, kurê Şêmeyîn, kurê Yûsêx, kurê Yoda,

²⁷kurê Yûhenan, kurê Rêşa, kurê Zerûbabel, kurê Şaltiyêl, kurê Nerî,

²⁸kurê Melkê, kurê Êdî, kurê Qosam, kurê Êlmedam, kurê Er,

²⁹kurê Yêşû, kurê Êliyazêr, kurê Yorîm, kurê Metat, kurê Lêwî,

³⁰kurê Şimûn, kurê Cihûda, kurê Ûsiv, kurê Yonam, kurê Êlyaqîm,

³¹kurê Melya, kurê Mena, kurê Metêta, kurê Natan, kurê Dawid,

³²kurê Yêşa, kurê Ovêd, kurê Bowaz, kurê Selmon, kurê Nehşon,

³³kurê Amînadav, kurê Admîn, kurê Aram, kurê Hesrûn, kurê Perez, kurê Cihûda,

³⁴kurê Aqûb, kurê Îshaq, kurê Birahîm, kurê Têrah, kurê Nehor,

³⁵kurê Serûx, kurê Rêwo, kurê Pêlêg, kurê Eber, kurê Şalah,

³⁶kurê Qênan, kurê Arpexşad, kurê Sam, kurê Nûh, kurê Lamex,

³⁷kurê Metûşela, kurê Henox, kurê Yarêd, kurê Mahalalêl, kurê Qênan,

³⁸kurê Enoş, kurê Sêt, kurê Adem, kurê Xwedê bû.