Read Kurmanji Încîl Romayî 3 Bible Online

Romayî 3 - Kurmanji Încîl bible

Romayî 3

¹Madem wisa ye, çi taybetiya Cihûyan heye? An feyda sinetbûnê çi ye?

²Bi her awayî gelek e. Berî her tiştî peyvên Xwedê li wan hatine spartin.

³Eger hinekan ji wan, bawerî neanîbe, çi dibe? Ma bêbaweriya wan dilsoziya Xwedê betal dike?

⁴Na, tu caran! Bila Xwedê rast û her mirov derewker be. Çawa ku hatiye nivîsîn: «Da ku, tu di peyvên xwe de rastdar derkevî Û çaxê ku bêyî dîwankirin, tu bi ser bikevî.»

⁵Lê eger neheqiya me rastdariya Xwedê nîşan dide, em çi bêjin? Ma Xwedê neheq e ku xezeba xwe bîne ser me? — Ez wek mirovan dibêjim. —

⁶Na, tu caran! Nexwe Xwedê wê çawa dîwana dinyayê bike?

⁷Lê eger bi derewkariya min rastiya Xwedê ji bo rûmeta wî zêde dibe, çima ez dîsa wek gunehkarekî, sûcdar têm derxistin?

⁸Çima em nebêjin: «Em xerabiyê bikin, da ku qencî jê derkeve?» wek ku hinek buxtanê li me dikin û tiştên ku me negotine davêjin ser me. Cezaxwarina yên weha rast e.

⁹Îcar çi? Ma em Cihû çêtir in? Na, bi tu awayî! Çimkî me berê jî hem Cihû û hem jî miletên din sûcdar kirin ku ew hemû di bin hêza guneh de ne.

¹⁰Çawa ku hatiye nivîsîn: «Tu kesê rast tune, tenê yek jî tune.

¹¹Tu kesê ku fêm dike tune, Tu kesê ku li Xwedê digere tune.

¹²Hemû ji rê derketin, Hemû bi hev re bêkêr bûn. Tu kesê ku qenciyê dike tune, Yek tenê jî tune.

¹³Gewriya wan gora vekirî ye, Bi zimanê xwe dixapînin. Jehra marê reş di bin zimanê wan de ye.

¹⁴Devê wan bi nifir û tehliyê tije ye.

¹⁵Lingên wan ji bo rijandina xwînê bilez in.

¹⁶Şopa wan wêranbûn û rebenî ye

¹⁷Û ew riya aştiyê nizanin.

¹⁸Tirsa Xwedê li ber çavê wan tune.»

¹⁹Îcar em dizanin her tiştê ku Şerîet dibêje, ji wan mirovan re dibêje ku di bin Şerîetê de ne, da ku her dev bê girtin û hemû dinya li ber Xwedê sûcdar be.

²⁰Çimkî bi kirina Şerîetê tu kes li ber Xwedê rastdar dernakeve. Ji ber ku bi Şerîetê guneh tê zanîn.

²¹Lê niha, bêyî şerîetê, rastdariya Xwedê eşkere bû û Şerîet û Nivîsarên Pêxemberan jî jê re şahidiyê dikin.

²²Ev rastdariya ji Xwedê ya ku bi bawerkirina bi Îsa Mesîh e, ji bo wan hemûyan e ku bawer dikin. Çimkî tu cihêtî tune:

²³Hemûyan guneh kir û ji rûmeta Xwedê bêpar man.

²⁴Ew bi kerema wî, bi rizgariya ku bi Mesîh Îsa hatiye, bê berdêl rastdar derdikevin.

²⁵Xwedê ew ji bo wan ên ku baweriyê bînin, wek goriyeke kefaretê bi xwîna wî pêşkêş kir. Wî ev kir, da ku dadperweriya xwe nîşan bide, çimkî wî bi sebra xwe çavên xwe li wan gunehên ku berê hatibûn kirin neqand.[1]

²⁶Wî ev yek kir, da ku di dema niha de rastdariya xwe eşkere bike û ew bi xwe rastdar be û yê ku baweriyê bi Îsa bîne, rastdar derkeve.

²⁷Îcar pesindan li ku derê ma? Ew li derve ma. Bi çi qanûnê? Ma bi kirina Şerîetê? Na, lê belê bi qanûna baweriyê.

²⁸Çimkî bîr û baweriya me ev e ku mirov bêyî kirina Şerîetê, bi baweriyê rastdar derdikeve.

²⁹Ma Xwedê, tenê Xwedayê Cihûyan e? Ma ew ne Xwedayê miletên din e jî? Belê, ew yê miletên din e jî,

³⁰çimkî Xwedê yek e û ewê yên sinetbûyî ji ber baweriya wan û yên sinetnebûyî jî bi baweriyê rastdar derxe.

³¹Eger wisa ye, ma em bi baweriyê Şerîetê betal dikin? Na, tu caran! Lê belê em Şerîetê erê dikin.