Read Kurmanji Încîl Korîntî I, 5 Bible Online

Korîntî I, 5 - Kurmanji Încîl bible

Korîntî I, 5

¹Bi rastî tê gotin ku di nav we de zîna heye. Hem jî zînayek wisa ku di nav miletên xwedênenas de jî tune: Heta yekî, jina bavê xwe biriye.

²Îcar şûna ku we şîn bigirta, da ku yê ev tişt kiriye ji nav we bihata rakirin, we ne girt, bi ser de jî hûn xwe dinepixînin!

³Bi bedenê ez ne li ba we bim jî, bi ruh ez di nav we de me. Wek ku ez di nav we de bim, min bi navê Xudan Îsa ji xwe biryara dîwana wî yê ku weha kiriye, daye.

⁴Gava ku hûn bicivin û ruhê min jî bi we re, tevî hêza Xudanê me Îsa,

⁵ji bo helakkirina bedenê, vî mirovî bidin destê Îblîs da ku di Roja Xudan de ruhê wî rizgar bibe.

⁶Ne qenc e ku hûn pesnê xwe didin. Ma hûn nizanin ku piçek hevîrtirşk tevahiya hevîr tirş dike?

⁷Xwe ji hevîrtirşkê kevin pak bikin ku hûn bibin hevîrê nû, wek ku hûn bê hevîrtirşk in. Çimkî berxê me yê Cejna Derbasbûnê Mesîh hatiye gorîkirin.

⁸Ji ber vê yekê em cejnê, ne bi hevîrtirşkê kevin, ne bi hevîrtirşkê kîn û xerabiyê, lê belê bi nanê şkeva yê dilpakî û rastiyê bikin.

⁹Min di nameya xwe de ji we re nivîsî ku hûn bi zînakaran re nebin heval.

¹⁰Ez qet li ser zînakar, çavbirçî, nijdevan û pûtperestên vê dinyayê nabêjim. Eger wisa bûya, diviya ku hûn ji vê dinyayê derketana.

¹¹Lê niha ez ji we re dinivîsim, bi yekî ku bira tê gotin, lê zînakar, çavbirçî, pûtperest, çêrker, serxweş an nijdevan be, pê re têkiliyê nekin, heta bi yekî weha re xwarinê jî nexwin.

¹²Ma çi karê min bi dîwankirina yên li derve heye? Ma nakeve ser we ku hûn dîwana yên hundir bikin?

¹³Xwedê wê dîwana yên derve bike. «Mirovê xerab ji nav xwe derxin.»