Read Kurmanji Încîl Galatî 6 Bible Online

Galatî 6 - Kurmanji Încîl bible

Galatî 6

¹Birano, eger yek di neheqiyekê de bê girtin, hûn ên ku ruhanî ne, yekî weha bi ruhê nermîtiyê bînin ser rê. Tu jî hay ji xwe hebe, da ku tu neyî ceribandin.

²Barên hevdû hilgirin û bi vî awayî Şerîeta Mesîh pêk bînin.

³Çimkî eger yek ne tiştek be û xwe tiştek hesab bike, ew xwe bi xwe dixapîne.

⁴Bila her kes karê xwe biceribîne. Hingê mirov ne bi kirinên hinekên din, lê tenê bi kirinên xwe dikare pesnê xwe bide.

⁵Çimkî her kes wê barê xwe hilgire.

⁶Yê ku di peyvê de hatiye hînkirin, bila di hemû tiştên qenc de parê bide wî yê ku hîn dike.

⁷Neyên xapandin! Tinaz bi Xwedê nayê kirin. Çimkî, mirov çi biçîne, wê wî bidirû.

⁸Yê ku li nefsa xwe biçîne, wê ji nefsê rizîbûnê bidirû. Lê yê ku li Ruh biçîne, wê ji Ruh jiyana herheyî bidirû.

⁹Û em ji qencîkirinê newestin, çimkî eger em sist nebin, emê di demsala wê de bidirûn.

¹⁰Nexwe heta ku fersenda me hebe, em ji hemûyan re, bi taybetî jî ji xwişk û birayên bawermend re qenciyê bikin.

¹¹Binêrin, ez bi destê xwe ji we re bi çi herfên mezin dinivîsim.

¹²Yên ku zorê li we dikin ku hûn sinet bibin, ew kes in ku dixwazin xwe bi tiştên bedenê derxin pêş. Ew bi tenê weha dikin, da ku mirov di ber xaça Mesîh de tengahiyê nedin wan.

¹³Her çiqas ew sinetbûyî ne jî, ew bi xwe Şerîetê pêk naynin, lê belê dixwazin ku hûn sinet bibin, da ku bi bedena we pesnê xwe bidin.

¹⁴Lê ji min dûr be ku ez ji xaça Xudanê me Îsa Mesîh pê ve bi tiştekî din pesnê xwe bidim. Bi wê xaçê dinya ji bo min hatiye xaçkirin û ez jî ji bo dinyayê.

¹⁵Çimkî ne sinetbûn, ne jî sinetnebûn, bi tenê afirandina nû tiştek e.

¹⁶Aştî û rehm li ser hemûyên ku li gor vê qeydeyî rêve herin û li ser Îsraêlê Xwedê be.

¹⁷Bila ji niha û pê ve tu kes zehmet nede min, çimkî cih-birînên Îsa li ser bedena min in.

¹⁸Birano, kerema Xudanê me Îsa Mesîh bi ruhê we re be. Amîn.