Read Kurmanji Încîl Selanîkî I, 5 Bible Online

Selanîkî I, 5 - Kurmanji Încîl bible

Selanîkî I, 5

¹Lê ji bo dem û wextan birano, ne hewce ye ku em tiştekî ji we re binivîsin.

²Hûn bi xwe qenc dizanin, ka diz bi şev çawa tê, Roja Xudan wê wisa bê.

³Gava xelk dibêjin: «Dinya aştî û ewledarî ye», hingê wek êşa jina bizaro, helak wê ji nişkê ve bê ser wan û qet nikarin birevin.

⁴Lê hûn birano, hûn ne di tariyê de ne, ku ew roj wek dizan bi ser we de bigire.

⁵Çimkî hûn hemû zarokên ronahiyê û zarokên rojê ne. Em ne ji şevê û ne jî ji tariyê ne.

⁶Nexwe em wek ên din ranezin, lê em hişyar û li ser hişê xwe bin.

⁷Çimkî ew ên ku radizin, bi şev radizin û ew ên ku serxweş dibin, bi şev serxweş dibin.

⁸Lê ji ber ku em ji rojê ne, divê em li ser hişê xwe bin û zirxê bawerî û hezkirinê wergirin û kumzirxê hêviya xilasiyê bidin serê xwe.

⁹Çimkî Xwedê em ne ji bo xezebê nîşan kirine, lê em nîşan kirine, da ku em bi Xudanê me Îsa Mesîh bigihîjin xilasiyê.

¹⁰Ew ji bo me mir, da ku, dixwazî em hişyar an jî razayî bin, em bi wî re bijîn.[2]

¹¹Ji bo vê yekê, wek ku hûn niha dikin, di ber dilê hev de werin û hevdû ava bikin.

¹²Îcar em hêvî ji we dikin birano, bizanin ew ên ku di nav we de dixebitin, di baweriya Xudan de serweriyê li we dikin û şîretan li we dikin, kî ne!

¹³Ji bo xebata wan ji wan hez bikin û bi zêdehî siyaneta wan bigirin. Bi hev re di aştiyê de bin.

¹⁴Birano, ji bo vê yekê em ji we hêvî dikin: Şîretan li yên ku jiyana wan bêserûber e bikin, hanê bidin bêziravan, ji yên lewaz re bibin piştevan, li hember hemû mirovan bîhnfireh bin.

¹⁵Hay jê hebin, bila tu kes di şûna xerabiyê de xerabiyê li yekî neke, lê hergav bikevin pey qenciyê, hem ji bo hev, hem jî ji bo hemû mirovan.

¹⁶Hergav şa bibin,

¹⁷bê rawestin dua bikin,

¹⁸di her tiştî de şikir bikin, çimkî daxwaza Xwedê, bi Mesîh Îsa ji bo we ev e.

¹⁹Ruhê Pîroz netemirînin.

²⁰Pêxemberîtiyan kêm nebînin.

²¹Her tiştî ji hev derxin, tiştê qenc hişk bigirin.

²²Xwe ji her cûreyê xerabiyê dûr bixin.

²³De bila Xwedayê aştiyê bi xwe we bi tevahî pîroz bike û hemû ruhê we, canê we û bedena we ji bo hatina Xudanê me Îsa Mesîh, bêqusûr bê parastin.

²⁴Ewê ku gazî we dike, dilsoz e û ewê bike jî.

²⁵Birano! Ji bo me jî dua bikin.

²⁶Bi ramûsana pîroz silavan li hemû birayan bikin.

²⁷Ez li ber Xudan tembîh li we dikim ku ev name, li ber hemû birayan bê xwendin.

²⁸Kerema Xudanê me Îsa Mesîh li ser we be.