Read Kurmanji Încîl Tîmotêyos II, 4 Bible Online

Tîmotêyos II, 4 - Kurmanji Încîl bible

Tîmotêyos II, 4

¹Îcar ez li ber Xwedê û li ber Mesîh Îsayê ku wê dîwana mirî û zindiyan bike û ji bo xatirê hatina wî û Padîşahiya wî tembîh li te dikim:

²Peyva Xwedê bide bihîstin, bi dem û bê dem li ser wê bisekine, bi hemû bîhnfirehî û hînkirinê hişyar bike, dengê xwe li wan hilde û cesaretê bide wan.

³Çimkî wext wê bê ku nexwazin guhê xwe bidin hîndariya saxlem, lê ewê di cihê vê de li gor xwestekên xwe, ji xwe re gelek mamosteyan bicivînin, yên ku tiştên li guhên wan xweş bên hîn bikin.

⁴Îcar ewê guhên xwe ji rastiyê bizivirînin û bikevin pey çîrokan.

⁵Lê heçî tu yî, tu di her tiştî de li ser hişê xwe be, di tengahiyê de sebir bike, karê mizgînvaniyê bike, xizmeta xwe bibe serî.

⁶Çimkî ji xwe ez dibim gorî û wextê çûyîna min hatiye.

⁷Min tekoşîna qenc kir, min hevbezîna xwe qedand û min bawerî parast.

⁸Û niha taca rastdariyê ji bo min amade ye, ku dadgerê dadperwer Xudan, wê rojê wê bide min û ne tenê min, lê wê bide wan hemûyan jî yên ku bêriya xuyabûna wî dikin.

⁹Bilezîne ku tu bêyî ba min.

¹⁰Çimkî Dîmas ji vê dinyayê hez kir û dev ji min berda, çû Selanîkê. Kireskîs çû Galatyayê, Tîtos jî çû Dalmetyayê.

¹¹Tenê Lûqa li ba min e. Marqos hilde û bi xwe re bîne, çimkî ew ji bo xizmetê bi kêrî min tê.

¹²Min Tixîkos şand Efesê.

¹³Gava ku tu bêyî, wî ebayê ku min li Troyayê li ba Karpos hiştiye, bi xwe re bîne, wisa jî nivîsarên lihevpêçayî, bi taybetî yên çermîn.

¹⁴Skenderê sifirker gelek xerabî li min kir. Xudan wê li gor kirinên wî bide wî.

¹⁵Tu jî hay ji wî hebe, çimkî ew gelek li hember gotina me rabû.

¹⁶Di parastina min a pêşî de tu kesî pişta min negirt, hemûyan ez tenê hiştim. Bila ev yek ji wan re guneh neyê hesabkirin!

¹⁷Lê Xudan li ba min rawesta û hêz da min, da ku bi saya min Mizgînî bi tevahî bê gotin û hemû milet bibihîzin. Îcar ez ji devê şêr rizgar bûm.

¹⁸Xudan wê min ji her tiştê xerab rizgar bike û ji bo Padîşahiya xwe ya ezmanî xilas bike. Rûmet her û her ji wî re be. Amîn.

¹⁹Silavan li Priskîla û Akîlas û herweha li mala Onîsîforos jî bike.

²⁰Erastos li Korîntê ma, Trofîmos jî min li Mîletosê nexweş hişt.

²¹Bilezîne ku tu beriya zivistanê bêyî. Eybûlos, Pûdês, Lînos, Klawdiya û hemû bawermend silavan li te dikin.

²²Xudan bi ruhê te re be. Kerem li ser we be.