Read Kurmanji Încîl Filêmon 1 Bible Online

Filêmon 1 - Kurmanji Încîl bible

Filêmon 1

¹Ji Pawlosê ku di ber Mesîh Îsa de girtî ye û birayê me Tîmotêyos, ji hevalkarê me yê hezkirî Filêmon re,

²ji xwişka me Afiya, ji hevalleşkerê me Arxîpos û ji civîna li mala we re:

³Ji Bavê me Xwedê û ji Xudan Îsa Mesîh, kerem û aştî li ser we be.

⁴Gava ku ez te di duayên xwe de tînim bîra xwe, ez hergav ji Xwedayê xwe re şikir dikim.

⁵Çimkî ez li ser hezkirina te ya ji bo hemû pîrozan û baweriya te ya bi Xudan Îsa dibihîzim.

⁶Duaya min ew e ku ew hevpariya ruhanî ya ku ji baweriya te tê, bandûra xwe nîşan bide, da ku tu bi Mesîh hemû qenciyê bizanî.

⁷Hezkirina te gelek şahî û han da min. Çimkî dilê pîrozan bi saya te rihetî dît, ey birayê min.

⁸Ji bo vê yekê, bi ser ku pirr cesareta min bi Mesîh heye ku ez, ya lazim li te emir bikim jî,

⁹ez dixwazim ji bo xatirê hezkirinê ji te hêvî bikim. Ez Pawlos, zilamekî navsere û niha jî di ber Mesîh Îsa de girtî,

¹⁰ez ji bo kurê xwe Onîsîmos ji te hêvî dikim ku ez di dema girtîbûna xwe de jê re bûm bav.

¹¹Demekê ew ji bo te bêkêr bû, lê niha ew hem ji bo min û hem jî ji bo te bi kêr e.

¹²Ez wî, yanî dilê xwe, ji te re bi şûn ve dişînim.

¹³Min dixwest ku ez wî li ba xwe bihêlim, da ku ew di vê dema ku ez ji ber Mizgîniyê girêdayî me, di cihê te de ji min re xizmetê bike.

¹⁴Lê min nexwest ku ez bê dilê te tiştekî bikim, da ku qenciya te bi dil be, ne ku ji mecbûrî be.

¹⁵Belkî jî sedemê ku ew demekê ji te dûr ket ev bû, ku ew her û her bibe yê te.

¹⁶Ji niha û pê ve, ew êdî ne wek xulamekî ye, lê ji xulamekî hêjatir, birayekî hezkirî ye; bi taybetî ji bo min, lê bêtir ji bo te, hem bi mirovî û hem jî di baweriya Xudan de.

¹⁷Îcar, eger tu min hevparê xwe dihesibînî, wî wek min qebûl bike.

¹⁸Eger wî di tiştekî de neheqî li te kiribe, an deyndar be, vê li ser hesabê min binivîse.

¹⁹Ez Pawlos, ez vê bi destê xwe dinivîsim: Ezê li te vegerînim — ez ji te re nebêjim ku tu xwe bi xwe jî deyndarê min î.

²⁰Erê birayê min, bila ji bo Xudan ev feyda min ji te hebe: Ji bo xatirê Mesîh dilê min rihet bike.

²¹Ji ber ku ez piştrast im, ku tê bi ya min bikî, ez ji te re dinivîsim û dizanim ku tê ji gotinên min zêdetir jî bikî.

²²Di vê navê de, ji bo min cihekî amade bike. Çimkî ez hêvî dikim ku ezê bi duayên we ji we re bêm bexişandin.

²³Êpafrasê ku bi min re di ber Mesîh Îsa de girtî ye silavan li te dike.

²⁴Hevalkarên min Marqos, Erîstarxos, Dîmas û Lûqa jî silavan li te dikin.

²⁵Kerema Xudan Îsa Mesîh bi ruhê we re be.