Read Kurmanji Încîl Samûêl I, 10 Bible Online

Samûêl I, 10 - Kurmanji Încîl bible

Samûêl I, 10

¹Samûêl qafikê rûn hilda û bi serê Şawûl ve rijand, ew ramûsa û got: «Xudan te ji gelê xwe re wek serwer kifş kir.

²Piştî ku îro tu ji ba min herî, li ser sînorê Binyamînê, li kêleka gora Rahêla li Selsahê, tê rastî du mirovan werî. Wê ji te re bibêjin: ‹Kerên ku tu lê digeriyayî hatin dîtin. Bavê te mitala keran nake, lê ew mitala we dike û dibêje: Ka kurê min li ku ye?›

³Ji wir tê pêşde herî û darberûya li Tavorê bibînî. Tê li wir rastî sê kesan werî ku hevrazê Bêt-Êlê dibin ji bo ku herin hizûra Xwedê. Di destê yekî de sê karik, di destê yê din de sê nan û di destê yê sisiyan de jî sê meşk şerab hene.

⁴Wê silavê li te bikin û du nan bidin te. Tê jî qebûl bikî.

⁵Piştre tê herî Gîvat-Êlohîmê ku cihê artêşgeha Filîstiyan li wir e. Gava tu ketî bajêr, tê rastî komekî pêxemberan werî. Li pêşiya wan hinek kes hene ku pêxemberiyê dikin û li def û tembûrê, li bilûr û li çengê dixin û ji cihê perizînê têne xwarê.

⁶Wê Ruhê Xudan bi hêzdarî li ser te deyne. Tê jî bi wan re pêxemberiyê bikî û tê bêyî guhertin.

⁷Kengê ev nîşan li te xuya bûn, çi lazim be bike. Çimkî Xwedê bi te re ye.

⁸Niha beriya min here Gîlgalê. Ji bo serjêkirina qurbanên aştî û şewitandinê ezê jî bêm ba te. Lê tê heft rojan li benda min bisekinî. Kengê ez hatim ba te, çi lazim be ezê ji te re bibêjim.»

⁹Gava Şawûl pişta xwe da Samûêl û çû, Xwedê dilekî nû da wî. Wê rojê hemû nîşan pêk hatin.

¹⁰Dema ku gihîşt Gîvayê, komeke pêxemberan pêşwaziya Şawûl kir. Ruhê Xwedê bi awayekî xurt li ser danî û wî bi wan re pêxemberî kir.

¹¹Kesên ku ew nas dikirin, gava dîtin ew jî bi pêxemberan re pêxemberî dike, ji hev pirsîn: «Çi bi kurê Qîş hatiye? Ma Şawûl jî bû pêxember?»

¹²Kesên li wir gotin: «Lê bavê wan kî ne?» Va ye, gotina «Ma Şawûl jî bû pêxember?» ji vir tê.

¹³Piştî ku Şawûl pêxemberî kir, hevrazê cihê perizînê bû.

¹⁴Apê wî, ji Şawûl û xizmetkarê wî pirsî: «Hûn li ku man?» Şawûl bersiv da û got: «Em li keran digeriyan, lê piştî ku me ew nedîtin, em çûn ba Samûêl.»

¹⁵Apê wî got: «De ka bêje, Samûêl ji te re çi got.»

¹⁶Şawûl ji apê xwe re got: «Wî got ku kerên me hatine dîtin.» Lê Şawûl gotinên Samûêl ên li ser padîşahiyê ji apê xwe re negotin.

¹⁷Samûêl gelê Îsraîlê li Mîspayê li ber Xudan civand.

¹⁸Wî got: «Xwedayê Îsraîl Xudan dibêje: ‹Min Îsraîlî ji Misrê derxistin. Min hûn ji destê Misriyan û hemû padîşahiyên zilimkar xilas kirin.›

¹⁹Lê we pişta xwe daye wî Xwedayê xwe ku hûn ji hemû zilm û zoriyan xilas kirine. Lê we got: ‹Na! Ji me re padîşahekî kifş bike.› Niha li ber Xudan, eşîr bi eşîr û binemal bi binemal bisekinin.»

²⁰Samûêl hemû eşîrên Îsraîl, yek bi yek derxist pêş. Ji wan eşîra Binyamîn, bi pişkê hat hilbijartin.

²¹Piştre binemal binemal, eşîra Binyamîn gazî pêşiyê kir. Binemala Matrî hat hilbijartin. Herî dawî jî, ji binemala Matrî, Şawûlê kurê Qîş hat hilbijartin. Li wî geriyan, lê ew nedîtin.

²²Wan careke din ji Xudan pirsîn: «Ew hê jî nehatiye vir?» Xudan got: «Ew li vir e, lê di nav hûr-mûran de xwe veşartiye.»

²³Li ser vê yekê çûn Şawûl ji wir anîn. Şawûl hat nava gel. Bejna wî seriyek ji hemûyan bilindtir bû.

²⁴Samûêl ji gel re got: «Hûn dibînin Xudan kî hilbijart? Di tevahiya gel de kesekî wek wî tuneye.» Li ser vê yekê gel bi dengekî bilind got: «Her bijî padîşah!»

²⁵Samûêl rê û rêbazên padîşahiyê ji gel re got. Wî wek pirtûk nivîsî û danî ber Xudan. Paşê her kesî şand malê.

²⁶Şawûl jî çû mala xwe ya li Gîvayê. Mêrxasên ku Xwedê xistibû dilê wan jê re hevaltî kirin.

²⁷Lê hinek kesên xerab gotin: «Ew çawa dikare me rizgar bike?» Wan Şawûl kêm dît û diyarî nedane wî. Lê Şawûl guh neda vê yekê.