Read Kurmanji Încîl Samûêl I, 13 Bible Online

Samûêl I, 13 - Kurmanji Încîl bible

Samûêl I, 13

¹Şawûl[22] piştî ku du salan ji Îsraîlê re padîşahî kir,

²wî ji nav gel sê hezar kes hilbijart. Ji van kesan du hezar kes li dora çiyayên Mîkmas û Bêt-Êlê li ba xwe bi cih kirin. Hezarê din jî li bajarê Gevaya bi ser eşîra Binyamîn li ba Yonatan, bi cih kirin. Gelê mayî jî şand malê.

³Yonatan, koma Filîstiyan li Gîvayê têk bir. Filîstiyan ev yek bihîst. Şawûl li tevahiya welêt boriya qiloçê da lêxistin û got: «Bila gel vê xeberê bibihîze.»

⁴Bi vî awayî, tevahiya Îsraîliyan bihîst ku Şawûl hêza Filîstî têk biriye û dilê Filîstiyan ji Îsraîliyan dixele. Li ser vê yekê gel li Gîlgalê li dora Şawûl kom bû.

⁵Filîstî ji bo bi Îsraîliyan re şer bikin kom bûn. Sê hezar[23] erebeyên şer, şeş hezar leşkerên siwarî û bi qasî sêlaka ber deryayê, xweyî artêşeke qelebalix bûn. Çûn li rojhilatê Bêtawenê, li Mîkmasê artêşgehek danîn.

⁶Îsraîliyên ku dîtin rewşa wan xerab e û leşkerên wan asê bûne, rabûn di şikeft, devî, zinar, kortik û sarincan de xwe veşartin.

⁷Hinek Îbranî jî ji nav Çemê Ûrdunê, derbasî herêma Gad û Gîladê bûn. Lê Şawûl hê jî li Gîlgalê bû. Tevahiya leşkeran, bi lerz li wî temaşe dikirin.

⁸Şawûl, bi wextê ku ji aliyê Samûêl ve hatiye diyarkirin girêdayî ma, heft rojan sekinî. Lê gava Samûêl nehat Gîlgalê, gel xwe ji dora Şawûl da alî.

⁹Şawûl got: «Qurbanên aştî û şewitandinê ji min re bînin.» Piştre qurbana şewitandinê da.

¹⁰Dema ku Şawûl ev yek qedand, Samûêl hat. Şawûl ji bo silavdayînê çû ba wî.

¹¹Samûêl pirsî û got: «Te çi kir?» Şawûl got: «Gel xwe ji min dida alî. Tu jî di roja kifşkirî de nehatî. Bi ser de Filîstî li Mîkmasê kom bûn. Li ser vê yekê min got:

¹²‹Niha Filîstî wê li Gîlgalê bi ser min de bên. Lê belê hê min alîkariya Xudan nexwestibû.› Ji ber vê yekê min pêwîst dît ku ez bixwe qurbana şewitandinê pêşkêş bikim.»

¹³Samûêl hêrs bû û got: «Te bêaqilî kir. Te guh neda fermana Xwedayê xwe Xudan ku li te kiribû. Heger te wisa nekira, wê Xudan padîşahiya te bêdawî bikira.

¹⁴Lê êdî wê padîşahiya te berdewam neke. Xudan dixwaze zilamekî li gorî dilê xwe bibîne û wî ji gelê xwe bike serwer. Çimkî te fermana Xudan bicih neanî.»

¹⁵Paşê Samûêl ji Gîlgalê çû bajarê Gevaya herêma Binyamîniyan.[24] Şawûl kesên ku li ba wî mane hejmartin: Nêzîkî şeş sed kes bûn.

¹⁶Şawûl, kurê wî Yonatan û kesên li ba wan li herêma Binyamîniyan li Gîvayê diman. Filîstiyan jî li Mîkmasê artêşgeh danîbû.

¹⁷Şervanên siwarî ji sê milan ve ji artêşgeha Filîstiyan derketin. Milek ji wan li herêma Şûelê ber bi Ofrayê ve çû.

¹⁸Milek ber bi Bêthoronê, milê din jî ji çolê ber bi sînor ve çû ku li pêşberî Geliyê Sevoyîmê bû.

¹⁹Li seranserê Îsraîlê, hesinkarek jî tunebû. Ji ber ku Filîstiyan digot: «Nabe ku Îbranî şûr û mertalan çêkin.»

²⁰Ji ber vê yekê ji bo ku Îsraîlî, gîsin, tevir, bivir û dasên xwe[25] tûj bikin, ji neçarî diçûn ba Filîstiyan.

²¹Bihayê tûjkirina gîsinek û tevirekê, du par ji sêyê şekelekî[26] bû. Bihayê tûjkirina zextan, tevir, zixtan dixwestin jî, ji sê paran yek yê şekelekê bû[27].

²²Ji ber vê yekê, di şer de ji Şawûl û Yonatan pê ve, bi kesî re şûr û rim tunebû.

²³Di vê navberê de milekî Filîstiyan derbasî Geliyê Mîkmasê bibû.