Read Kurmanji Încîl Samûêl I, 15 Bible Online

Samûêl I, 15 - Kurmanji Încîl bible

Samûêl I, 15

¹Samûêl ji Şawûl re got: «Xudan ez şandim ku te li ser gelê xwe Îsraîlê bi rûnkirinê kifş bikim. Niha guh bide gotinên Xudan.

²Xudanê Karîndar wiha dibêje: ‹Li bîra min e Amalêq çi anî serê Îsraîlê. Gava ew ji Misrê derketin, di rê de li dijî wan rabûn.

³Rabe here li Amalêq bixe û her tiştê wan bi tevahî tune bike. Li ber wan nekeve. Ji mêr, jin û zarokan bigire heta zarokên berşîr, ga, pez, deve heta bi kerên wan hemûyan bikuje.›»

⁴Şawûl gazî li gel kir û li Telayîmê tevdîra şer kir. Du sed hezar peya û ji Cihûdayê jî deh hezar kes bûn.

⁵Şawûl hat bajarê Amalêqê û li gelî kemîn danî.

⁶Şawûl ji Qêniyan re got: «Herin veqetin, ji nav Amalêqiyan derkevin ku ez bi wan re we jî helak nekim. Çimkî dema ew ji Misrê derketin we dilovanî bi hemû Îsraîliyan re kir.» Qênî jî ji nav Amalêqiyan veqetiyan.

⁷Şawûl ji Hawîlayê heta bigihîje Şûra li pêş Misrê li Amalêqiyan xist.

⁸Wî tevahiya gel da ber şûran. Lê belê Padîşahê Amalêqiyan Agag dil girt.

⁹Şawûl û leşkerên wî, tevî Agag, tevahiya pez-dewarên qelew û dermalekirî, hemû tiştên baş parastin. Wan nexwest bi tevahî tune bikin. Bi tenê tiştên bê qîmet û qels tune kirin.

¹⁰Gotina Xudan ji Samûêl re hat û got:

¹¹«Ez poşman bûm ku min Şawûl kir padîşah. Çimkî êdî ji pey min vegeriya û gotinên min bi cih neanî.» Hêrsa Samûêl rabû û tevahiya şevê hewar û gaziyê xwe bir Xudan.

¹²Serê sibê zû Samûêl rabû ku pêşwaziya Şawûl bike, lê ji Samûêl re gotin: «Şawûl hat Karmelê, ji bo xwe peykerekê çêkir û berjêrî Gîlgalê bû.»

¹³Gava Samûêl hat, Şawûl jê re got: «Tu ji aliyê Xudan ve pîroz bî. Min gotina Xudan pêk anî.»

¹⁴Samûêl bi hêrs got: «Lê ev kale-kala pêz û qore-qora dewêr çi ye?»

¹⁵Şawûl got: «Gel ew ji Amalêqiyan standin ku ji Xwedayê te Xudan re bikin qurban. Wan dil neda pez û dewarên herî baş bikujin. Lê me yên mayîn bi temamî kuştin.»

¹⁶Samûêl ji Şawûl re got: «Hiş be! Ezê niha tiştên ku Xudan îşev ji min re got, ji te re bêjim.» Wî jî got: «Keremke.»

¹⁷Samûêl got: «Tevî ku te xwe biçûk jî didît, ma tu nebûyî serokê eşîrên Îsraîl? Xudan li ser Îsraîlê tu wek padîşah kifş kir.

¹⁸Xudan tu şandî û got: Here û Amalêqiyên sûcdar bi tevahî tune bike û kit ji wan nehêle.

¹⁹Çima te gotinên Xudan bi cih neanî, te çavê xwe berda malê talên û te xerabî di çavê Xudan de kir?»

²⁰Şawûl ji Samûêl re got: «Lê min bi gotina Xudan kir! Min da ser riya wî! Min Agagê Padîşahê Amalêqê anî û kit ji Amalêqiyan nehişt.

²¹Gel pez û dewarê herî baş ji talên, ji Xwedayê te Xudan re anîn ku li Gîlgalê bikin qurban.»

²²Lê Samûêl got: «Ma Xudan ji guhdariya gotinên xwe zêdetir, ji pêşkêşî û qurbanên şewitandinê hez dike? Guhdarîkirin ji qurbanan û îtaetkirin ji bezê beranan çêtir e.

²³Çimkî serhildêrî wek gunehê falbaziyê û serhişkî jî wekî pûtperestî xerab e. Te gotina Xudan red kir. Wî jî tu ji padîşahiyê red kirî.»

²⁴Şawûl ji Samûêl re got: «Min guneh kir, çimkî min dev ji ferman Xudan û ji gotinên te berda, ez ji gel tirsiyam û min bi ya wan kir.

²⁵Niha lava dikim, gunehê min bibexişîne û bi min re were ku biperizim Xudan.»

²⁶Samûêl ji Şawûl re got: «Ez bi te re nayêm. Çimkî te gotina Xudan red kirin. Xudan ji bo ku tu li ser Îsraîlê nebî padîşah, tu jî red kirî.»

²⁷Dema Samûêl zivirî ku here, Şawûl bi dawa xiftanê wî girt û ew qetiya.

²⁸Samûêl jê re got: «Xudan jî îro padîşahî ji te qetand û da cîranekî ji te çêtir.

²⁹Xwedayê Herheyî yê Îsraîlê, hîle nake û poşman jî nabe. Çimkî ew ne mirov e ku poşman bibe.»

³⁰Şawûl ji Samûêl re got: «Min guneh kir, vêga li pêş gelê min, li pêş rîspiyan, li pêş Îsraîlê rûmeta min bigire, bi min re were, ezê biperizim Xwedayê te Xudan.»

³¹Samûêl rabû da pey Şawûl. Şawûl li wir perizî Xudan.

³²Samûêl got: «Agagê Padîşahê Amalêqiyan bînin vê derê.» Agag bi kêfxweşî hat û got: «Şikir, ez ji mirinê jî filitîm!»

³³Lê Samûêl got: «Çawa ku şûrê te dayikan bêzarok hiştibe, wê dayika te jî li nav jinan bêzarok bimîne.» Samûêl li Gîlgalê li ber Xudan, Agag perçe kir.

³⁴Samûêl çû Ramayê û Şawûl çû mala xwe ya li Gîvayê.

³⁵Samûêl heta roja mirina xwe jî Şawûl nedît. Lê ew herdem li ber Şawûl diket. Herçî Xudan bû, poşman bibû ku Şawûl kiribû Padîşahê Îsraîlê.