Read Kurmanji Încîl Samûêl I, 18 Bible Online

Samûêl I, 18 - Kurmanji Încîl bible

Samûêl I, 18

¹Bi gotina Şawûl re, Yonatan bi Dawid ve hat girêdan. Wî bi dil û can, wekî nefsa xwe jê hez kir.

²Şawûl hema wê rojê ew li ba xwe hişt û neşand malê.

³Ji ber ku Yonatan bi dil û can, wekî nefsa xwe jê hez dikir, soz û peymana biratiyê dane hev.

⁴Yonatan xiftanê xwe ji xwe kir. Wî ew, tevî zirx, şûr, kevan û piştêna xwe da Dawid.

⁵Dawid her cihê ku Şawûl jê re got here, diçû û serfiraz dibû. Şawûl ew kir yek ji serleşkerên xwe. Ev bi dilê tevahiya gel bû. Leşkerên Şawûl jî jê razî bûn.

⁶Dema ku Dawid Golyatê Filîstî kuşt, di vegerê de ji hemû bajaran jinên Îsraîlî bi def û tembûrên xwe yên sê têlî, bi kêf û şahî, bi govend û stranan pêşwaziya Şawûlê Padîşah kirin.

⁷Diketin govendê û digotin: «Şawûl kuşt bi hezaran, Dawid kuşt bi deh hezaran.»

⁸Gava Şawûl bihîst hêrsa wî rabû. Di dilê xwe de got: «Deh hezar dane Dawid, lê hezar dane min. Hew maye ku padîşahiyê bidinê.»

⁹Ji wê rojê ve Dawid li ber çavê Şawûl reş bibû.

¹⁰Dotira rojê Xwedê ruhekî xerab bi awayekî xurt bi ser Şawûl ve şand. Di malê de bêhemdê xwe dipeyivî. Dawid wekî her car li çengê dixist. Di destê Şawûl de jî rimek hebû.

¹¹Şawûl ji nişkave bi armanca ku Dawid bi dîwêr ve bimixîne, rima xwe avêtê. Lê Dawid du caran xwe ji ber da alî.

¹²Şawûl ji Dawid tirsiya, çimkî Xudan pê re bû lê ji Şawûl dûr ketibû.

¹³Şawûl Dawid dûrî xwe xist û ew kir fermandarê hezar leşkeran. Êdî Dawid bibû pêşengê leşkeran.

¹⁴Dawid di her karî de serfiraz dibû. Çimkî Xudan pê re bû.

¹⁵Şawûl dît ku ew gelek serfiraz e. Loma jî jê bêtir tirsiya.

¹⁶Tevahiya Îsraîl û Cihûdayê ji Dawid hez dikirin. Ji ber ku wî rêberiya wan dikir.

¹⁷Şawûl ji Dawid re got: «Va ye ev keça min a mezin Mêrav e. Ezê wê bidim te û êdî tê bi mêrxasî ji bo Xudan şer bikî.» Çimkî Şawûl difikirî û digot: «Bila kuştina Dawid ne bi destê min, lê bi destê Filîstiyan be.»

¹⁸Dawid got: «Ez kî me, eşîr û malbata bavê min di nava Îsraîlê de çi ye ku ez bibim zavayê padîşah?»

¹⁹Wext hat Şawûlê ku divê Mêrava keça xwe bida Dawid, rabû da Edriyêlê Meholayî.

²⁰Di vê navberê de dilê Mîkala keça biçûk a Şawûl ketibû Dawid. Haya Şawûl ji meselê hebû û ev yek jê re bû fersend.

²¹Çimkî Şawûl difikirî û digot: «Ezê Mîkalê bidim wî ku ji bo Dawid bibe dafik û Filîstî jî wî bikujin.» Rabû ji Dawid re got: «Îro ji bo te fersenda diduyan e ku tu bibî zavayê min.»

²²Şawûl ferman da xulamên xwe û got: «Ji Dawid re bi dizî bêjin: ‹Padîşah û hemû xulamên wî ji te hez dikin. Wext hat ku tu bibî zavayê padîşah.›»

²³Xulam hatin û ji Dawid re gotin. Dawid ji wan re got: «Li gorî we kesekî wekî min feqîr û belengaz dikare wisa bi hêsanî bibe zavayê padîşah?»

²⁴Xulamên wî zivirîn û gotinên Dawid ji Şawûl re gotin.

²⁵Şawûl ji wan re got: «Ji Dawid re wisa bêjin: ‹Padîşah qelen naxwaze. Bi tenê dixwaze heyfa xwe ji dijminên xwe hilîne. Ji bo vê jî çermê sinetkirina sed Filîstiyan dixwaze.›» Şawûl dixwest Dawid bi destê Filîstiyan bide kuştin.

²⁶Xulaman gotinên Şawûl ji Dawid re gotin. Ev yek li xweşa Dawid hat ku êdî dikare bibe zavayê padîşah. Dawid di demeke kurt de

²⁷tevî leşkerên xwe çû ji Filîstiyan du sed kes kuştin. Çermê sinetkirina wan anî danî ber padîşah ku bibe zavayê wî. Şawûl rabû Mîkala keça xwe da Dawid.

²⁸Şawûl dît ku Xudan bi Dawid re ye û keça wî Mîkalê jî jê hez dike.

²⁹Şawûl piştî vê yekê ji Dawid zêdetir tirsiya. Ji wê rojê pê ve herdem dijminatiya Dawid kir.

³⁰Her ku serleşkerên Filîstî êrîş dikirin, Dawid ji serleşkerên din ên Şawûl serketîtir dibû. Loma jî nav û dengê wî her zêde bû.