Read Kurmanji Încîl Samûêl I, 23 Bible Online

Samûêl I, 23 - Kurmanji Încîl bible

Samûêl I, 23

¹Ji Dawid re xeber şandin û gotin: «Filîstiyan êrîşî bajarê Qeîlayê kirine û tevahiya bênderên wan talan dikin.»

²Dawid bi Xudan şêwirî û got: «Ez herim êrîşî van Filîstiyan bikim?» Xudan bersiv da û got: «Here êrîşî Filîstiyan bike û bajarê Qeîlayê rizgar bike.»

³Lê zilamên wî ji Dawid re gotin: «Binêre, gava em li vir, li Cihûdayê ne, em ditirsin. Gava em herin Qeîlayê, li dijî artêşa Filîstiyan şer bikin, emê bêtir bitirsin.»

⁴Li ser vê yekê Dawid careke din bi Xudan şêwirî. Xudan jê re careke din got: «Rabe, here Qeîlayê! Çimkî ezê Filîstiyan bi destê xwe radestî te bikim.»

⁵Bi vî awayî Dawid û zilamên li ber destê wî, çûn Qeîlayê, li dijî Filîstiyan şer kirin. Dawid heywanên wan bi dest xistin. Filîstiyan bi awayekî giran têk bir û xelkê Qeîlayê rizgar kir.

⁶Kurê Ahîmelek Aviyatar, dema ku reviya û çû Qeîlayê ba Dawid, êfodê[41] jî bi xwe re biribû.

⁷Şawûl dema ku bihîst Dawid çûye bajarê Qeîlayê got: «Xwedê Dawid da destê min. Dawid ket bajarekî bi dergeh û zirze û bi vî awayî xwe heps kir.»

⁸Şawûl gaziya şer li tevahiya gel kir ku ber bi Qeîlayê ve bimeşin û Dawid û zilamên wî dorpêç bikin.

⁹Dawid dema ku fêm kir Şawûl li dijî wî fen çêkiriye, ji Aviyatarê Kahin re got: «Êfodê bîne.»

¹⁰Piştre got: «Ya Xwedayê Îsraîl Xudan! Xulamê te bihîstiye ku Şawûl dixwaze were Qeîlayê û ji rûyê min qira bajêr bîne.

¹¹Gelo wê gelê Qeîlayê min bide dest? Çawa ku xulamê te bihîstiye wê Şawûl were? Ya Xwedayê Îsraîl Xudan, ez lava dikim ji xulamê xwe re bêje!» Xudan bersiv da û got: «Wê Şawûl were.»

¹²Dawid ji Xudan pirsî: «Gelo wê gelê Qeîlayê min bide destê Şawûl?» Xudan got: «Wê bide!»

¹³Li ser vê yekê Dawid û bi qasî şeş sed kesên li ba wî, ji Qeîlayê derketin û herkes bi aliyekî ve çû. Şawûl gava bihîst ku Dawid ji Qeîlayê reviyaye, neçû wir.

¹⁴Dawid li sitargehên Beriya Zîfê û deverên çiyayî xwe vedişart. Şawûl her roj lê digeriya, lê Xwedê Dawid nedida destê wî.

¹⁵Dawid gava li Beriya Zîfê, li Horeşê bû, bihîst ku Şawûl daye rê ku wî bikuje.

¹⁶Di vê navberê de kurê Şawûl Yonatan rabû çû Horeşê ba Dawid û li ser navê Xwedê hêz da wî.

¹⁷Got: «Netirse! Bavê min Şawûl wê dest nede te. Tê bibî Padîşahê Îsraîlê, ezê jî bibim alîkarê te. Bavê min Şawûl jî vê yekê dizane.»

¹⁸Her duyan jî, li ber Xudan peymana xwe nû kirin. Piştre Yonatan vegeriya mala xwe, lê Dawid li Horeşê ma.

¹⁹Zîfî çûn Gîvayê û ji Şawûl re gotin: «Dawid di nav me de ye. Ew li başûrê Yeşîmonê, di sitargehên Horeşê ku li ser girê Haxîlayê ye xwe vedişêre.

²⁰Ya padîşah, tu kengê dixwazî were! Bihêle em Dawid bidin destê te.»

²¹Şawûl got: «Xudan bila we pîroz bike! Hûn li ber min ketin.

²²Herin li pey bigerin ka Dawid xwe li ku vedişêre. Li ku dimîne, kî wî dibîne, baş hîn bibin. Çimkî ji bo wî dibêjin pir fêlbaz e.

²³Li ku xwe vedişêre hîn bibin û ji min re bibêjin. Wê gavê ezê jî bi we re bêm. Heger Dawid li wir be, di nav tevahiya binemalên Cihûdayê de ezê lê bigerim û wî bibînim.»

²⁴Bi vî awayî Zîfî rabûn û beriya Şawûl, çûn Zîfê. Wê gavê Dawid û peyayên wî li Beriya Maonê yanî Yeşîmonê ku diket Başûrê Eravayê.

²⁵Dawid ku bihîst Şawûl û zilamên wî hatine lê digerin, dakete jêr û xwe di zinarê li Beriya Maonê de parast. Dema ku Şawûl ev bihîst, li pey Dawid çû Beriya Maonê.

²⁶Şawûl li vî aliyê gelî, Dawid û zilamên wî jî li aliyê din ê gelî ber bi hev ve dimeşiyan. Dawid, hewl dida ku bireve û xwe ji Şawûl û peyayên wî xilas bike. Leşkerên Şawûl ji bo Dawid û zilamên wî bigirin nêzîk bûn.

²⁷Qasid hat û ji Şawûl re got: «Zû were! Filîstî êrîşî welat dikin.»

²⁸Li ser vê yekê Şawûl dev ji Dawid berda. Rabû çû ku bi Filîstiyan re şer bike. Loma ji wê derê re Sela-Hammahleqot[42] hat gotin.

²⁹Dawid ji wir derket, xwe li sitargehên herêma Eyn-Gediyê veşart.