Read Kurmanji Încîl Samûêl I, 24 Bible Online

Samûêl I, 24 - Kurmanji Încîl bible

Samûêl I, 24

¹Şawûl piştî ku dev ji peyketina Filîstiyan berda, pê hesiya ku Dawid li Beriya Eyn-Gediyê ye.

²Şawûl ji tevahiya Îsraîlê sê hezar leşkerên bijare civandin ku li Bilindciyê Pezkoviyan li Dawid û zilamên wî bigere.

³Di rê de rastî hevşiyên pêz hat. Li wir şikeftek jî hebû. Şawûl ji bo avrêjê ket şikeftê. Dawid û zilamên wî jî, di binê vê şikeftê de diman.

⁴Peyayên Dawid jê re gotin: «Va ye roja ku Xudan ji te re gotibû, ‹Ji bo daxwazên te, ezê dijminê te bidim destê te.› Ew roj ev roj e!» Dawid rabû ji dawa Şawûl, perçeyek bi dizî jê kir.

⁵Lê paşê ji ber vê kirina xwe li ber xwe ket.

⁶Ji peyayên xwe re got: «Xwedê neke ku ez li dijî xweyê xwe, kifşkiriyê Xudan vî tiştî bikim. Ez destê xwe li dijî kifşkiriyê Xudan ranakim.»

⁷Dawid bi van peyvan zilamên xwe asteng kir û nehişt ku êrîşî Şawûl bikin. Şawûl ji şikeftê derket û da rê.

⁸Dawid jî ji şikeftê derket. Gazî Şawûl kir û got: «Padîşahê min, ezbenî!» Gava Şawûl li pey xwe zivirî, Dawid xwe tewand, deverû çû erdê û jê re got:

⁹«Tu çima guhdariya wan kesan dikî ku dibêjin: ‹Dawid li pey xerabiya te ye?›

¹⁰Va ye tu bi çavên xwe dibînî ku Xudan çawa di şikeftê de te da destê min. Hinekan xwest ku ez te bikujim. Lê min tu parastî, min got: ‹Ez destê xwe li xweyê xwe ranakim, ji ber ku ew kifşkiriyê Xudan bi xwe ye.›

¹¹Bavo, li vî perçeyî destê min binêre ku ji dawa xiftanê te hatiye jêkirin. Belê lê binêre! Min ji dawa xiftanê te perçeyek qut kir, lê min tu nekuştî. Ji ber vê yekê, baş bizane ku di dilê min de xerabî û fikra serhildanê tuneye. Dîsa jî, tu dixwazî min bikujî.

¹²Bila Xudan bibe dadgerê min û te û heyfa min ji te bistîne. Lê ezê destê xwe li te bilind nekim.

¹³Li gorî gotina pêşiyan: ‹Ji xeraba xerabî dertê› lê ezê destê xwe li te bilind nekim.

¹⁴Gelo Padîşahê Îsraîlê li dijî kê rabûye? Tu bera kê didî? Kûçikekî mirî yan kêçekê?

¹⁵Bila Xudan bibe hakimê min û te û biryarê bide. Bila Xudan li doza min binêre, min biparêze û ji destê te rizgar bike.»

¹⁶Dema ku Dawid gotina xwe qedand, Şawûl jê pirsî: «Dawid kurê min, ev dengê te ye?» Paşê bi dengekî bilind giriya.

¹⁷Jê re got: «Tu zilamekî ji min rastir î. Min xerabî li te kir, lê te bi qencî bersiva min da.

¹⁸Îro te eşkere kir ku te qencî li min kiriye: Xudan ez dam destê te, lê te ez nekuştim.

¹⁹Ma kesek heye ku dijminê xwe bigire û sax bihêle? Bila Xudan jî ji ber vê qenciya ku te bi min kir, te xelat bike.

²⁰Êdî ez baş dizanim ku tê padîşahiyê bikî û padîşahiya Îsraîlê bi te xurt bibe.

²¹Niha bi Xudan sond bixwe ku tê piştî min, ziriyeta min qir nekî û navê min ji nav mala bavê min ranekî.»

²²Dawid çawa ku Şawûl xwest sond xwar. Piştre Şawûl çû mala xwe. Dawid û peyayên wî jî, çûn sitargehê.