Read Kurmanji Încîl Samûêl I, 26 Bible Online

Samûêl I, 26 - Kurmanji Încîl bible

Samûêl I, 26

¹Zîfî çûn Gîvayê ba Şawûl û gotin: «Dawid li girê Haxîlaya ku li pêşberî Yeşîmonê ye xwe vedişêre.»

²Li ser vê yekê Şawûl bi sê hezar leşkerên bijare yên Îsraîlî re, çû Beriya Zîfê ji bo ku li Dawid bigere.

³Li kêleka riya girê Haxîlaya pêşberî Yeşîmonê, artêşgeh danî. Dawid li beriyê bû. Dema fêm kir ku Şawûl ketiye pey wî,

⁴çavdêr şandin. Bi vî awayî hîn bû ku Şawûl nêzîk e.

⁵Li ser vê yekê Dawid çû cihê ku Şawûl artêşgeh lê daniye û dît ku Şawûl û fermandarê artêşa wî Avnêrê kurê Nêr radizin. Şawûl li nava artêşgehê, leşker jî li dora wî radizan.

⁶Ahîmelekê Hîtîtî û Avîşayê birayê Yoav kurên Serûyayê bûn. Dawid ji wan re got: «Wê kî bi min re bê artêşgehê ba Şawûl?» Avîşay got: «Ezê bi te re bêm.»

⁷Dawid û Avîşay wê şevê ketin artêşgehê. Şawûl rima wî li ber serê wî di axê de daçikandî li navenda artêşgehê radiza. Avnêr û leşker jî li derdora wî radizan.

⁸Avîşay ji Dawid re got: «Îro Xwedê dijminê te da destê te. Bihêle ez bi rima wî bi yekcarî wî bi erdê bimixînim. Cara diduyan êdî ne lazim e ez li wî bixim.»

⁹Lê Dawid got: «Wî nekuje. Kî destê xwe dirêjî kifşkiriyê Xudan bike, wê sûcdar be.

¹⁰Ez bi navê Xudanê Jîndar sond dixwim ku wê Xudan bi xwe lê bixe. Wê roja wî bê û bimire, yan jî wê di şer de bê kuştin.

¹¹Lê bila Xudan nehêle ku ez destê xwe dirêjî kifşkiriyê Xudan bikim. De ka rimê li ber serê Şawûl û şerbikê wî yê avê hilde ku em herin.»

¹²Bi vî awayî Dawid rimê li ber serê Şawûl û şerbikê avê hilda û çûn. Kesî ew nedîtin. Haya kesî ji wan nebû. Kesek jî hişyar nebû. Çimkî Xudan xeweke giran xistibû çavên wan.

¹³Dawid derbasî aliyê din bû. Li serê girekî sekinî. Ew ji hev gelekî dûr bûn.

¹⁴Dawid gazî leşkeran û Avnêrê kurê Nêr kir û got: «Ho Avnêro! Dengê min tê te?» Avnêr lê vegerand: «Tu kê yî ku gazî padîşah dikî?»

¹⁵Dawid got: «Ma tu ne mêrxas î? Ma di nava Îsraîlê de kesekî wek te heye? Te xweyê xwe, padîşahê xwe neparast. Ji bo ku wî bikuje, kesek hat û ket artêşgehê.

¹⁶Te karê xwe nîvco hişt. Bi navê Xudanê Jîndar mirin heqê we hemûyan e! Çimkî we xweyê xwe, kifşkiriyê Xudan neparast. Ka here binêre, rimê li ber serê padîşah û şerbikê wî ya avê li ku ye?»

¹⁷Şawûl ev deng nas kir û got: «Dawid, lawo ev tu yî?» Dawid got: «Belê ezbenî, padîşahê min, ez im.

¹⁸Ezbenî, tu çima berdidî min, berdidî xulamê xwe? Min çi kiriye? Sûcê min çi ye?

¹⁹Lava dikim guhdariya xulamê xwe bike. Heger kesê tu li dijî min rakirî Xudan e, bila qurbanekê qebûl bike. Lê heger ew kes mirov bin, bila nifriyên Xudan li wan bin! Çimkî gotin: ‹Here ji îlahan re xulamiyê bike!› û min ji para Xudan dûr kirin.

²⁰Bila xwîna min li axa dûrî Xudan nerije. Padîşahê Îsraîlê, wekî nêçîrvanê kewan çûye nêçîra kêçekê dike!»

²¹Li ser vê yekê Şawûl got: «Min guneh kir. Kurê min Dawid vegere. Ez êdî xerabiyê li te nakim. Çimkî te îro qîmet da min. Bi rastî jî min bêaqilî kir, min şaşiyeke pir mezin kir.»

²²Dawid got: «Va ye rimê padîşah! Bila zilamekî te were û hilde.

²³Xudan her kesî li gorî rastbûn û dilsoziya wî xelat dike. Îro Xudan tu dayî destê min, lê min nexwest destê xwe dirêjî kifşkiriyê Xudan bikim.

²⁴Îro min çawa qedir dabe te, bila Xudan jî qedir bide min û min ji her tengasiyê serbest bike.»

²⁵Şawûl got: «Kurê min Dawid, bila Xudan te pîroz bike! Tê karên mezin bikî û bi ser bikevî.» Paşê Dawid da rê çû, Şawûl jî vegeriya mala xwe.