Read Kurmanji Încîl Samûêl I, 27 Bible Online

Samûêl I, 27 - Kurmanji Încîl bible

Samûêl I, 27

¹Dawid ji xwe re got: «Ezê rojekê bi destê Şawûl bêm kuştin. Ji bo min riya baş ew e ku birevim welatê Filîstiyan. Wê gavê wê Şawûl, dev ji min berde û li welatê Îsraîlê li min negere. Bi vî awayî ezê ji destê wî xwe xilas bikim.»

²Dawid û şeş sed kesên pê re, bûn alîgirê Axîşê kurê Maokê Padîşahê Gatê.

³Ew tevî malbatên xwe li Gatê li ba Axîş bi cih û war bûn. Her du jinên Dawid li ba wî bûn; Ahînoamê Yîzreyêlî û Avîgayila kevnejina Navalê Karmelî.

⁴Piştî ku Şawûl bihîst Dawid reviyaye Gatê, dev jê berda.

⁵Dawid ji Axîş re got: «Heger ez bi dilê te xweş bim, li bajarên derdorê bila li cihekî biçûk bidin min ku ez li wir bijîm. Çimkî ez xulamê te, ne pêwist e bi te re, li bajarê padîşah bijîm.»

⁶Axîş wê rojê bajarê Zîqlagê da wî. Loma heta îro jî Zîqlag digihîje padîşahên Cihûdayê.

⁷Dawid li ser axa Filîstiyan salek û çar meh ma.

⁸Di vê navberê de Dawid û zilamên xwe, avêt ser Geşûriyan, Gîrziyan û Amalêqiyan. Demeke dirêj bû ew li ser axekê dijiyan ku heta Şûrê û welatê Misrê berfireh bû.

⁹Gava Dawid êrîşî herêmekê dikir, nedigot jin û mêr, tu kesî sax nedihişt. Pez û dewar, ker û deve, cil û berg talan dikir û ji Axîş re dianî.

¹⁰Dema ku Axîş digot: «We îro êrîş biriye ser ku?» Dawid digot: «Me êrîş bir ser başûrê Cihûdayê, başûrê Yerahmeyêliyan û Qêniyan.»

¹¹Dawid ji bo ku tu kesî bi xwe re nebe Gatê, ne jin ne jî mêr tu kesî sax nedihişt. Çimkî wî digot: «Bila neçin Gatê û nebêjin: ‹Dawid wiha kir, wisa kir, li dijî me xeber nedin.›» Dawid li ser axa Filîstiyan çiqas ma ev yek berdewam kir.

¹²Axîş her diçû bi Dawid ewle dibû û digot: «Dawid xwe li ber çavê gelê xwe Îsraîlê reş kir. Loma jî heta hetayê wê bibe xulamê min.»