Read Kurmanji Încîl Samûêl I, 28 Bible Online

Samûêl I, 28 - Kurmanji Încîl bible

Samûêl I, 28

¹Wê gavê Filîstî ji bo ku bi Îsraîliyan re şer bikin yekîneyên xwe yên leşkerî kom kirin. Axîş ji Dawid re got: «Divê tu bizanibî ku tê bi zilamên xwe re, li ba min şer bikî.»

²Dawid got: «Wê gavê tê jî bibînî ku xulamê te dikare çi bike.» Axîş got: «Baş e. Heta ku ez bijîm, ezê te ji bo xwe bikim peywirdarê parastinê.»

³ Samûêl miribû, tevahiya gelê Îsraîlê ji bo wî ketibû şînê. Wî li bajarê wî Ramayê binax kiribûn. Şawûl jî cinbaz û kesên bi ruhan dişêwirîn ji welat qewirandibû.

⁴Filîstî kom bûn û çûne Şûnêmê û li wir artêşgehek danîn. Şawûl jî tevahiya Îsraîliyan kom kir û li Çiyayê Gilboayê artêşgeh danî.

⁵Şawûl dema ku artêşa Filîstî dît, gelekî tirsiya.

⁶Her çiqas bi Xudan şêwirî be jî, Xudan ne bi xewnan, ne bi Ûrîm, ne jî bi riya pêxemberan bersiva Şawûl da.

⁷Li ser vê yekê Şawûl wiha emir da peywirdarên xwe: «Ji min re jineke cinbaz bibînin ku ez pê bişêwirim.» Peywirdaran got: «Li Eyn-Dorê jineke cinbaz heye.»

⁸Şawûl cil û bergên cuda li xwe kirin û xwe guhert. Bi şev bi du kesan re çû û hat ba jina cinbaz. Ji jinikê re got: «Lava dikim ji bo min şêwra xwe bi ruhan bike û kesê ku ezê navê wî bidim, gazî wî bike.»

⁹Lê jinikê jê re got: «Tu dizanî Şawûl çi kir? Kesên şêwra xwe bi cinan û ruhan dikin ji welat dûr xist. Tu dixwazî min jî bidî kuştin?»

¹⁰Şawûl sond xwar û got: «Bi navê Xudanê Jîndar ji vê tu xerabî nagihêje te.»

¹¹Li ser vê yekê jinikê pirsî: «Ji bo te gazî kê bikim?» Şawûl got: «Ji bo min gazî Samûêl bike.»

¹²Jinik, dema ku Samûêl dît, qîriya û got: «Tu Şawûl î! Te çima ez xapandim?»

¹³Padîşah jê re got: «Netirse! Tu çi dibînî?» Jinikê got: «Ez îlahekî dibînim ku ji bin erdê derdikeve.»

¹⁴Şawûl pirsî: «Dişibe çi?» Jinikê got: «Pîremêrekî ku xiftan li xwe kiriye, ber bi jor ve hildikişe.» Wê gavê Şawûl fêm kir ku ew Samûêl e. Deverû çû erdê.

¹⁵Samûêl ji Şawûl re got: «Te çima gazî min kir û ez aciz kirim?» Şawûl wiha got: «Ez di nava tengasiyeke mezin de me. Filîstî li dijî min şer dikin, Xwedê jî pişta xwe da min. Êdî ji bo min ne bi riya pêxemberan, ne jî bi riya xewnan bersiv nade. Ji bo şêwrê min gazî te kir gelo ez çi bikim?»

¹⁶Samûêl got: «Madem Xudan pişta xwe daye te û êdî ne bi te re ye, tu çima bi min dişêwirî?

¹⁷Xudan bi riya min gotina xwe bi cih anî, padîşahiya te ji te stand û da Dawidê cîranê te.

¹⁸Çimkî te guh neda emrê Xudan, te hêrsa wî ya dijwar nîşanî Amalêqiyan neda. Loma Xudan ev yek anî serê te.

¹⁹Xudan wê te jî, gelê Îsraîlê jî bide destê Filîstiyan. Sibê tu û kurên xwe, hûnê tevli min bibin. Xudan wê artêşa Îsraîlê jî bide destê Filîstiyan.»

²⁰Şawûl ji nişkave li erdê dirêj bû. Ji gotinên Samûêl pir tirsiya. Ji taqetê ketibû. Çimkî tevahiya şev û rojê nan nexwaribû.

²¹Jinik nêzîkî Şawûl bû, dît ku ew di nav ecêbmayîneke mezin de ye. Jê re got: «Binêre koleya te li gotina te guhdarî kir. Min jiyana xwe avête xeterê û tiştê ku te ji min xwest min kir.

²²Lava dikim niha guhdariya vê koleyê bike. Bihêle ez hinekî xwarin deynim ber te. Ji bo ku tu bidî rê, divê tu xwarinê bixwî.»

²³Lê Şawûl got: «Ez naxwazim bixwim.» Lê bi zora xizmetkarên xwe û jinikê, bi ya wan kir, ji erdê rabû û li ser nivînan rûnişt.

²⁴Li mala jinikê golikekî qelew hebû. Jinikê ew bi lez serjê kir. Hevîr kir û nanê şikeva çêkir.

²⁵Danî ber Şawûl û peywirdarên wî. Wan jî xwarin. Paşê wê şevê rabûn û çûn.