Read Kurmanji Încîl Samûêl I, 29 Bible Online

Samûêl I, 29 - Kurmanji Încîl bible

Samûêl I, 29

¹Filîstiyan tevahiya artêşên xwe li Afêqê kom kirin. Îsraîliyan jî artêşgehek li keviya kaniya Yîzreyêlê danîbû û li wir diman.

²Begên Filîstî bi yekîneyên xwe re dimeşiyan ku her yek ji wan ji sed an hezar mirovî pêk dihatin. Dawid û zilamên xwe jî tevî Axîş li pey wan dihatin.

³Serleşkerên Filîstî pirsîn û gotin: «Çi karê van Îbraniyan li vir heye?» Axîş ji wan re got: «Ev Dawid e. Ew peywirdarê Padîşahê Îsraîlê ye. Ji salekî zêdetir e ku li ba min dimîne. Ji dema ku hatiye ba min heta îro, min jê tu xerabî nedîtiye.»

⁴Lê fermandarên Filîstiyan ji Axîş hêrs bûn û gotin: «Vî zilamî paş ve bişîne, bila here cihê ku te daye wî. Bila bi me re neyê şer. Wê di şer de li dijî me derkeve. Wê bi çi awayî li ber xweyê xwe rûspî be? Wê riyeke baştir hebe ku ew zilamên me bikuje?!

⁵Ma ev ne ew Dawid e ku di govendê de li ser wî digotin: «‹Şawûl kuşt bi hezaran, Dawid kuşt bi deh hezaran›?»

⁶Li ser vê yekê Axîş gazî Dawid kir û got: «Bi navê Xudanê Jîndar tu mirovekî rast î. Min dixwest tu bi min re beşdarî şer bibî. Ji roja ku tu hatî ba min heta niha, min tu tevgereke te ya çewt nedîtiye. Lê begên Filîstiyan ji te hez nekirin.

⁷Niha here! Oxira te ya xêrê be. Li ber çavê begên Filîstiyan, tiştekî xerab neke.»

⁸Dawid pirsî û got: «Lê min çi kir? Ji roja ku ez hatime ba te, te çi xerabiya min dîtiye ku ez bi xweyê xwe padîşah re neyêm şer?»

⁹Axîş got: «Ez dizanim tu wekî milyaketekî Xwedê baş î, lê belê serleşkerên Filîstî dibêjin: ‹Bila bi me re neyê şer.›

¹⁰Tevî xulamên xweyê xwe serê sibê rabin û herin.»

¹¹Bi vî awayî Dawid û zilamên xwe, serê sibê rabûn û çûn welatê Filîstiyan. Filîstî jî çûn Yîzreyêlê.