Read Kurmanji Încîl Samûêl I, 3 Bible Online

Samûêl I, 3 - Kurmanji Încîl bible

Samûêl I, 3

¹Samûêlê biçûk, di bin rêveberiya Elî de, xizmet ji Xudan re dikir. Di wan rojan de, gotina Xudan kêm dihat. Dîtinî jî kêm bûbûn.

²Şevekê Elî di nav nivînên xwe de radiza. Bînahiya çavan ewqas kêm bibû ku bi zorê didît.

³Qendîla Xwedê hê netefiyabû. Samûêl li Perestgeha Xudan ku Sindoqa Xwedê bû, radiza.

⁴Xudan gazî Samûêl kir. Samûêl got: «Keremke.»

⁵Paşê çû ba Elî û jê re got: «Te gazî min kir, keremke.» Lê Elî got: «Min gazî te nekir, here razê.» Samûêl jî çû raza.

⁶Xudan dîsa got: «Samûêl!» Samûêl rabû, çû ba Elî û jê re got: «Keremke, te gazî min kir.» Elî got: «Min gazî te nekir lawo, here razê.»

⁷Samûêl hê jî Xudan nas nedikir. Hê gotina Xudan jê re nehatibû eşkerekirin.

⁸Xudan cara sisiyan gazî Samûêl kir. Samûêl rabû û ji Elî re got: «Keremke, te gazî min kir.» Wê gavê Elî fêm kir ku Xudan gazî Samûêlê biçûk kiriye.

⁹Li ser vê yekê ji Samûêl re got: «Here razê. Gava careke din gazî li te bike, bêje: ‹Keremke ya Xudan, guhê xulamê te li te ye.›» Samûêl çû li cihê xwe raza.

¹⁰Xudan hat li wir sekinî û her wekî berê got: «Samûêl, Samûêl!» Samûêl got: «Kerem bike, guhê xulamê te li te ye.»

¹¹Xudan ji Samûêl re wiha got: «Hindik maye ezê tiştekî bikim ku li Îsraîlê her kesê ku bibihîze, wê zendegirtî bimîne.

¹²Wê rojê her tiştê ku min derbarê malbata Elî de got, ezê ji serî heta binî pêk bînim.

¹³Min ji Elî re got ku ji ber gunehê ku haya wî jê heye, ezê malbata wî heta hetayê bidarizînim. Çimkî zarokên wî li dijî Xwedê bêrûmetî kirin[8]. Elî rê li ber wan negirt.

¹⁴Ji ber vê yekê min sond xwar û got: ‹Wê gunehê Mala Elî bi tu awayî ne bi qurban, ne jî bi pêşkêşiyê were bexişandin.›»

¹⁵Samûêl heta serê sibê raza, paşê wî deriyên Mala Xudan vekirin. Nedixwest ji Elî re bêje ku çi dîtiye.

¹⁶Lê Elî wiha gazî wî kir û got: «Lawo Samûêlo!» Samûêl got: «Keremke!»

¹⁷Elî pirsî: «Xudan ji te re çi got? Ji min veneşêre. Heger tu ji tiştên hatine gotin, tiştekî jî ji min veşêrî, bila Xwedê jê xerabtir bîne serê te!»

¹⁸Samûêl tiştekî jê veneşart û jê re got. Elî jî got: «Ew Xudan e, bila ya xwe bike.»

¹⁹Samûêl mezin dibû û Xudan jî pê re bû. Hemû sozên Xudan pêk hatin. Gotinên wî vala derneketin.

²⁰Ji Danê heta Bîr-Şevayê, tevahiya Îsraîlê fêm kir ku Samûêl wek pêxemberekî Xudan hatiye şandin.

²¹Xudan wan rojan li Şîloyê bi berdewamî xuya dibû. Ew li wir bi peyva xwe li Samûêl xuya dibû.