Read Kurmanji Încîl Samûêl I, 31 Bible Online

Samûêl I, 31 - Kurmanji Încîl bible

Samûêl I, 31

¹Filîstî bi Îsraîliyan re ketin şer. Îsraîlî ji ber Filîstiyan reviyan. Gelek ji wan li Çiyayê Gilboayê mirin, li erdê dirêj bûn.

²Filîstî ketin pey Şawûl û kurên wî. Yonatan, Avînadav û Malkî-Şûayê kurên Şawûl kuştin.

³Şer bi Şawûl re giran bû. Ew ji aliyê tîravêjên Filîstî ve hat birîndarkirin. Birîna wî xedar bû.

⁴Şawûl ji çekdarê xwe re got: «Şûrê xwe bikişîne û li min bixe. An ev bêsinetên hanê wê bên, min bidin ber şûran û tinazên xwe bi min bikin.» Lê çekdarê wî gelek tirsiya û nexwest vê yekê bike. Li ser vê yekê Şawûl rabû şûrê xwe kişand û xwe avêt ser şûr.

⁵Gava çekdar dît Şawûl miriye, wî jî xwe avêt ser şûrê wî û pê re mir.

⁶Wê rojê Şawûl, tevî sê kurên wî, çekdarê wî û tevahiya zilamên wî mirin.

⁷Îsraîliyên li deştê û li aliyê din ê Çemê Ûrdunê dîtin ku artêşa Îsraîlê reviyaye û Şawûl û kurên wî jî mirine. Li ser vê yekê wan jî bajarên xwe terikandin û reviyan. Filîstî hatin û li wan bajaran bicih bûn.

⁸Roja din Filîstî vegeriyan ku kesên hatine kuştin bişelînin. Wan cendekê Şawûl û her sê kurên wî jî li Çiyayê Gilboayê dîtin.

⁹Serê Şawûl jêkirin û çekên wî rakirin. Piştre qasid şandin seranserê welatê xwe ku vê xebera baş li malikên pûtên xwe û di nav gel de belav kirin.

¹⁰Çekên Şawûl xistin perestgeha Eştoretê û cendekê wî li ser sûra Bêtşeanê mix kirin.

¹¹Gava gelê Yavêş-Gîladê tiştê hatî serê Şawûl bihîst,

¹²hemû mêrxas rabû û bi şev dan rê û çûn Bêtşeanê. Cendekên Şawûl û kurên wî ji sûra Bêtşeanê daxistin, birin Yavêşê û li wir şewitandin.

¹³Piştre hestiyên wan kom kirin û di bin dargezeka li Yavêşê de veşartin. Heft rojan rojî girtin.