Read Kurmanji Încîl Samûêl I, 4 Bible Online

Samûêl I, 4 - Kurmanji Încîl bible

Samûêl I, 4

¹Gotinên Samûêl li tevahiya Îsraîlê belav bû[9]. Îsraîlî ji bo şerê Filîstiyan bikin rabûn çûn û li bajarê Even-Ezerê artêşgeh danî. Filîstiyan jî artêşgeha xwe li bajarê Afêqê danî.

²Filîstî li hember Îsraîliyan ketin kozik û çeperan. Şer li her derê belav bû. Filîstiyan zora Îsraîliyan bir. Li qada şer nêzîkî çar hezar Îsraîlî hatin kuştin.

³Dema ku leşker vegeriyan artêşgehê, rîspiyên Îsraîlî got: «Ji bo çi îro Xudan kir ku Filîstî zora me Îsraîliyan bibin? Werin em Sindoqa Peymana Xudan ji Şîloyê bînin vir. Heger ew li nav me be, wê Xudan me ji destê dijminên me rizgar bike.»

⁴Gel mirov şandin Şîloyê. Sindoqa Peymana Xudanê Karîndar ku di nav xerûban[10] de textê xwe danîbû, anîn wir. Herdu kurên Elî, Hofnî û Pînehas jî li ba Sindoqa Peymana Xwedê bûn.

⁵Dema ku Sindoqa Peymana Xudan gihîşt nava artêşgehê, tevahiya Îsraîliyan bi dengekî wisa bilind qîriyan ku erd û ezman lerizî.

⁶Dema ku Filîstiyan qîrîna wan bihîst, gotin: «Wateya qîrîna bi dengê bilind a Îbraniyan li artêşgehê çi ye?» Dema ku hîn bûn Sindoqa Xudan anîne artêşgehê,

⁷bi tirs gotin: «Îlah hatine artêşgehê. Wey li me! Berê tiştekî wisa qet nebibû.

⁸Wey li me! Wê kî me ji destê van îlahên xurt xilas bike? Îlahên ku Misrî li çolê bi her belayê ceza kirin, ev îlah in.

⁹Bi hêz bin Filîstîno, mêrxas bin! An na, Îbraniyan çawa serî li ber we tewand, hûnê jî wisa serî li ber wan bitewînin. Ji ber vê yekê bi mêrxasî şer bikin!»

¹⁰Bi vî awayî, Filîstiyan şer kir û zora Îsraîliyan birin. Tevahiya Îsraîliyan reviyan malên xwe. Têkçûn wisa mezin bû ku sî hezar leşkerên Îsraîliyan mirin.

¹¹Sindoqa Xwedê ket destê Filîstiyan û herdu kurên Elî, Hofnî û Pînehas mirin.

¹²Kesekî ji eşîra Binyamînê ji qada şer reviya û hema wê rojê gihîşte Şîloyê. Wî kincên xwe çirandibûn û xwelî li serê xwe kiribû.

¹³Zilam dema gihîşt Şîloyê, Eliyê ku ji bo Sindoqa Xwedê dilê wî dilerizî, li kêleka rê li ser kursiyekî rûniştî, bi fikar sekinîbû. Dema ku zilam ket nav bajêr û her tişt got, tevahiya kesên bajêr qîriyan.

¹⁴Dema Elî ev qîrîn bihîst, got: «Ev çi qîrîn e?» Zilam bi lez çû ba Elî ku jê re bêje.

¹⁵Wê gavê Elî nod û heşt salî bû. Çavên wî qels bûbûn, baş nedidît.

¹⁶Zilam ji Elî re got: «Ez ji qada şer têm, îro ji şer reviyam.» Elî pirsî «Çi qewimî lawo?»

¹⁷Zilam got: «Îsraîlî ji ber Filîstiyan reviyan. Leşker bi giranî şikestin. Herdu kurên te, Hofnî û Pînehas mirin. Sindoqa Xwedê jî hat bidestxistin.»

¹⁸Dema ku zilam behsa Sindoqa Xwedê kir, Elî ji ser kursiyê xwe yê li ber dergehê bajêr bi paşkî ket. Ji ber ku kal û giran bû, stûyê wî şikest û mir. Wî çil salan li Îsraîlê hikûm kiribû.

¹⁹Bûka Elî, jina Pînehas, giran bû û li ber zarokanînê bû. Dema ku bihîst Sindoqa Xwedê hatiye desteserkirin û xezûr û mêrê wê mirine, êşa wê zêde bû, li erdê çok danî û zaro anî.

²⁰Dema ku li ber mirinê bû, jinên ku alîkariya wê dikirin gotin: «Netirse, kurek ji te re bû» lê wê guh neda, bersiv jî neda.

²¹Wê got: «Rûmet ji Îsraîlê rabû» û navê Îxavod[11] li zarokê xwe danî. Sindoqa Xwedê hatibû desteserkirin, xezûr û mêrê wê jî miribûn.

²²Got: «Rûmet ji Îsraîlê rabû. Çimkî Sindoqa Xwedê hat desteserkirin.»