Read Kurmanji Încîl Samûêl I, 5 Bible Online

Samûêl I, 5 - Kurmanji Încîl bible

Samûêl I, 5

¹Filîstiyan, piştî ku Sindoqa Xwedê desteser kirin, wê ji Even-Ezerê birin Aşdodê.

²Sindoqa Xwedê birin ber perestgeha Dagonê îlah, li kêleka peyker bi cih kirin.

³Aşdodiyên ku dotira rojê serê sibê hişyar bûn, dîtin ku Dagon serdevkî li ber Sindoqa Xudan ketiye erdê. Dagon hildan û danîn cihê wî.

⁴Lê roja din gava serê sibê rabûn, dîsa dîtin ku Dagon li ber Sindoqa Xudan serdevkî li erdê ye. Vê carê serê wî û herdu milên wî şikestibûn, li ber şêmikê bû û bi tenê gewdeya wî mabû.

⁵Kahinên Dagon û kesên din ku dihatin pîrozgeha wî ya li Aşdodê, ji wê rojê heta niha pê li şêmika perestgehê nakin.

⁶Xudan nexweşiyeke giran anî serê Aşdodiyan û gelên derdorê. Kunêr di laşê wan de derxistin û ew tengezar kirin.[12]

⁷Aşdodiyan li ser vê yekê wiha got: «Sindoqa Xwedayê Îsraîl divê li ba me nemîne, ji ber ku wê em jî, îlahê me Dagon jî bi awayekî giran ceza kir.»

⁸Li ser vê yekê wan çend qasid şandin û gazî tevahiya begên Filîstiyan kirin. Wiha gotin: «Em çi ji Sindoqa Xwedayê Îsraîl bikin?» Began got: «Sindoqa Xwedayê Îsraîl bibin Gatê.» Bi vî awayî Sindoqa Xwedayê Îsraîl birin Gatê.

⁹Piştî ku Sindoq birin Gatê, Xudan ew bajar jî ceza kir. Tirseke mezin ket nav bajêr. Xudan ji biçûkan bigire heta mezinan xelkê bajêr bi kunêran ceza kir.

¹⁰Sindoqa Xwedê birin Eqronê. Bi hatina sindoqê re Eqronî qîriyan: «Ji bo ku me û gelê me tune bikin Sindoqa Xwedayê Îsraîl ji me re anîn!»

¹¹Tevahiya begên Filîstiyan berhev kirin û gotin: «Sindoqa Xwedayê Îsraîl ji vir dûr bixin û bişînin cihê wê. Ji bo ku me û gelê me helak neke.» Çimkî tirsa mirinê ketibû her derê bajêr. Cezayê Xwedê pir giran bû.

¹²Kunêr di laşê saxan de derketin. Qîrîna bajariyan gihîşte ezmanan.