Read Kurmanji Încîl Samûêl I, 6 Bible Online

Samûêl I, 6 - Kurmanji Încîl bible

Samûêl I, 6

¹Sindoqa Xudan heft mehan li welatê Filîstiyan ma.

²Filîstiyan gazî kahin û falbazan kirin û gotin: «Em çi ji Sindoqa Xudan bikin? Ka ji me re bêjin, em çawa vegerînin?»

³Wan got: «Sindoqa Xwedayê Îsraîl vala neşînin. Divê hûn pêşkêşiyeke berdêlê bidin. Wî çaxî hûnê baş bibin û bizanibin Xwedê çima we ceza dike.»

⁴Filîstiyan wiha pirsîn: «Em wek pêşkêşiyeke berdêlê çi jê re bişînin?» Kahin û falbazan got: «Pêşkêşiya we ya berdêlê, li gorî hejmara begên Filîstiyan, bila pênc kunêrên zêrîn û pênc mişkên zêrîn be. Çimkî ev bela li ser we û li ser mîrên we ye.

⁵Loma jî çawa ku kunêr û mişkan vî welatî xera dikin, hûn jî wisa bikin. Bi vê yekê, Xwedayê Îsraîl rûmetdar bikin. Dibe ku Xwedayê wan cezayê li ser we, welatê we û îlahên we kêmtir bike.

⁶Ev çi dilreqî û serhişkiya we ye ku hûn wekî Misriyan û Firewn dikin? Ma hûn nizanin piştî ku Xwedê gelek bela anîn serê Misriyan ew serbest berdan û kir ku Îsraîlî ji Misrê derkevin?

⁷«Niha erebeyeke nû û du heb çêlekên dotinê ku neketine bin nîr hazir bikin. Erebeyê bi çêlekan ve girê bidin. Lê golikên wan ji wan dûr bikin û bibin tewlê.

⁸Sindoqa Xudan deynin nav erebeyê û taximên zêrîn ku hûnê jê re bikin pêşkêşiya berdêlê bixin nava qutiyekê û deynin kêleka wê. Paşê bila erebe here.

⁹Lê bila çavê we li ser be. Heger ew bi riya Bêtşemeşê re derbasî welatê xwe bibe, naxwe Xwedê ev belaya mezin bi ser me de şandiye. Heger na emê bizanibin ku ev bela ne ji wî ye lê bi xwe çêbûye.»

¹⁰Wan mirovan wisa kirin. Du heb çêlekên dotinê anîn û bi erebeyê ve girê dan. Golikên wan jî xistin tewlê.

¹¹Qutiya ku di nav de mişkên zêr û kunêrên zêr hene, bi Sindoqa Xudan re xistin erebeyê.

¹²Çêlek rasterast di riya Bêtşemeşê re çûn. Bêyî ku bi milê çep û rastê ve averê bibin kirin orînî û çûn. Begên Filîstî heta sînorê Bêtşemeşê li pey wan çûn.

¹³Bêtşemeşiyan li deştê genim didirût. Gava serê xwe bilind kirin, sindoq dîtin û pê şa bûn.

¹⁴Erebe li zeviya Yêşûyê Bêtşemeşî, li kêleka kevirekî mezin sekinî. Bêtşemeşî rabûn darên erebeyê şikandin, çêlek jî wekî qurbana şewitandinê pêşkêşî Xudan kirin.

¹⁵Lêwiyiyan Sindoqa Xudan û qutiya li kêleka wê hildan ku tê de taximên zêrîn hebûn. Ew danîn ser wî kevirî. Wê rojê Bêtşemeşiyan ji bo Xudan qurbanên şewitandinê û qurbanên din pêşkêş kirin.

¹⁶Pênc begên Filîstî piştî ew tişt dîtin hema wê rojê vegeriyan Eqronê.

¹⁷Filîstî, ji bo bajarên Aşdod, Xeza, Aşqelon, Gat û Eqronê, ji bo Xudan wek pêşkêşiyeke berdêlê, kunêrên zêrîn şandin.

¹⁸Tevî gund û derdorê, pênc bajarên bisûr ên pênc begên Filîstiyan hebûn. Hejmara mişkên zêrîn jî ewqas bûn. Ew kevirê li zeviya Yêşûyê Bêtşemeşî ku Sindoqa Xudan wê rojê danîbûn ser, wekî şahid îro jî heye.

¹⁹Ji bo ku li nava Sindoqa Xudan nihêrîbûn, Xudan ji Bêtşemeşiyan gelek kes ceza kirin û heftê mirovî [13] tune kir. Ji ber xezeba mezin a Xudan, gel şîn girê da.

²⁰Bêtşemeşiyan digot: «Kî dikare li ber Xudan bisekine ku Xwedayê Pîroz e? Gelo piştî me dora kê ye?»

²¹Paşê ji xelkê Qîryat-Yearîmê re qasid şandin û gotin: «Filîstiyan Sindoqa Xudan vegerandin. Werin bibin.»