Read Kurmanji Încîl Samûêl I, 7 Bible Online

Samûêl I, 7 - Kurmanji Încîl bible

Samûêl I, 7

¹Gelê Qîryat-Yearîmê hat Sindoqa Xudan hilda û ew bir mala Avînadav ku li ser girekî bû. Ji bo ku xweyîtî li Sindoqa Xudan bike Êlazarê kurê Avînadav kifş kirin.

²Sindoq demeke dirêj, bi qasî bîst salan li Qîryat-Yearîmê ma. Di wê navberê de tevahiya Mala Îsraîl bêriya Xudan kir.

³Samûêl ji Mala Îsraîl re wiha got: «Heger hûn bi hemû dilê xwe û bi hemû canê xwe vegerin Xudan, îlahên xerîb û pûtên Eştoretê ji nav xwe rakin. Xwe bispêrin Xudan û bi tenê xulamiya wî bikin. Wê Xudan jî we ji destê Filîstiyan rizgar bike.»

⁴Îsraîliyan pûtên Baal û Eştoretê avêtin û bi tenê dest bi xulamiya Xudan kirin.

⁵Samûêl got: «Tevahiya gelê Îsraîlê, li Mîspayê kom bikin, ezê jî ji bo we lavayî Xudan bikim.»

⁶Îsraîliyên ku li Mîspayê kom bûn, ji bîrê av derxist û li pêşiya Xudan rijand. Wê rojê rojî girtin û gotin: «Me li ber Xudan guneh kir.» Samûêl li Mîspayê pêşengiya Îsraîlê kir.

⁷Gava Filîstiyan bihîst ku gelê Îsraîlê li Mîspayê kom bûye, Begên wan li dijî Îsraîliyan rabûn. Li ser vê yekê Îsraîlî tirsiyan.

⁸Ji Samûêl re gotin: «Dev ji lavakirinê bernede ku Xwedayê me Xudan, me ji destê Filîstiyan rizgar bike.»

⁹Samûêl berxek ji ber şîr hilda û bi tevahî ji bo Îsraîliyan wekî qurbana şewitandinê pêşkêşî Xudan kir. Xudan jî bersiva wî da.

¹⁰Dema ku Samûêl ev yek dikir, Filîstî ji bo êrîşê nêzîk bûbûn. Lê Xudan qîrîneke dijwar kir ku Filîstî pir tirsiyan û li dijî Îsraîliyan şikestin.

¹¹Îsraîlî ji Mîspayê derketin, heta Bêtkarê dane pey Filîstiyan û qira wan anîn.

¹²Samûêl kevirek hilda û di navbera Mîspa û Şênê de daçikand. «Xudan heta vir alîkariya me kiriye» got û navê Even-Ezer[14] li vî kevirî kir.

¹³Filîstiyên ku şikestin, careke din sînorê Îsraîlê derbas nekirin. Heta Samûêl sax bû, Xudan rê li ber êrîşên Filîstiyan girt.

¹⁴Ji Eqron heta Gatê, bajar û derdora wan ku Filîstiyan standibûn li Îsraîlê vegerandin. Aştiya Îsraîlî û Amoriyan saz bû.

¹⁵Heta Samûêl hebû pêşengî ji Îsraîliyan re kir.

¹⁶Her sal li Bêt-Êl, Gîlgal û Mîspayê digeriya. Ji wan bajaran gelê Îsraîl birêve dibir.

¹⁷Piştre vedigeriya mala xwe ya li Ramayê. Samûêl gelê Îsraîl ji wir birêve dibir. Wî li wir ji bo Xudan gorîgehek çêkir.