Read Kurmanji Încîl Samûêl I, 8 Bible Online

Samûêl I, 8 - Kurmanji Încîl bible

Samûêl I, 8

¹Samûêl dema kal bû, kurên xwe kirin pêşengên Îsraîlê.

²Kurê wî yê mezin Yoêl, kurê diduyan jî Aviya bû. Herdu jî li Bîr-Şevayê pêşengî dikir.

³Lê kurên wî di riya wî de nediçûn. Li pey kara xwe digeriyan, bertîl distandin û heq didan xwarin.

⁴Li ser vê yekê hemû rîspiyên Îsraîlî civiyan û li Ramayê çûn ba Samûêl.

⁵Jê re gotin: «Va ye tu êdî kal bûyî. Kurên te di riya te de nameşin. Were, tu jî wekî hemû miletan padîşahekî kifş bike ku bibe serwerê me.»

⁶Lê ev yek ne bi dilê Samûêl bû. Ji ber ku wan gotibû: «Padîşahekî kifş bike ku bibe serwerê me.» Samûêl ji Xudan re dua kir.

⁷Xudan ji Samûêl re got: «Guhdariya miletê xwe bike û li gorî wan here. Çimkî ne tu, lê ez ji aliyê wan ve hatime redkirin.

⁸Ji roja ku min ew ji Misrê derxistin heta niha, çi anîbin serê min ew anîne serê te jî. Wan dev ji min berda, perizîn îlahan.

⁹Guh bide wan, lê wan bi awayekî eşkere hişyar bike. Behsa rêbaza serweriya wî padîşahî ji wan re bike ku wê bibe padîşahê wan.»

¹⁰Samûêl hemû gotinên Xudan ji gel re got ku jê padîşahek dixwest.

¹¹Wî got: «Kesê ku ji we re padîşahiyê bike wê serweriya wî wiha be: Wê kurên we deyne ser erebeyên şer û wan bike siwariyên xwe. Wê erebeya wî ya şer biparêzin.

¹²Hinek ji wan wê bibin fermandarê hezar kesî, hinek bibin yê pêncî kesî. Wê hinek çandiniya wî bikin, hinek zeviyên wî rakin, hinek jî wê jê re çek û erebeyan çêkin.

¹³Wê keçikên we hilde ji bo ku rûnên bêhnxweş tev bidin, xwarinê çêkin û nanpêjiyê bikin.

¹⁴Wê erdên we yên baş, rezên we, zeytûnên we ji we bistîne û bide xizmetkarên xwe.

¹⁵Wê ji deha yekê dexil û tiriyê we bistîne, li karmendên xwe yên qesrê û xizmetkarên xwe belav bike.

¹⁶Wê xulam û xadimên we, conegayên we[15] yên herî qenc, kerên we hilde û ji bo xwe bide xebitandin.

¹⁷Wê ji deha yekê pezê we hilde. Hûnê jî bibin xulamên wî.

¹⁸Wê rojê ji ber padîşahê ku we hilbijartiye hûnê bikin hewar û zarîn. Lê wê Xudan guh nede we.»

¹⁹Lê gel guhdariya Samûêl nekir û got: «Na! Tenê bila padîşahek li ser me hebe.

²⁰Bi vî awayî emê jî bibin wekî miletên din. Padîşahê me wê serweriya me bike, wê li pêş me here şerên me birêve bibe.»

²¹Samûêl guhdariya hemû gotinên milet kir û ew ji Xudan re gotin.

²²Xudan ji Samûêl re got: «Gotina wan bike û padîşahekî li ser wan kifş bike.» Li ser vê yekê Samûêl ji Îsraîliyan re got: «Bila herkes vegere bajarê xwe.»