Read Kurmanji Încîl, 2009 Zebûr 140 Bible Online

Zebûr 140 - Kurmanji Încîl, 2009 bible

Zebûr 140

¹Ya Xudan, tu min xelas ke ji zilamê xerab, Min biparêze ji zilamê zordar.

²Ew ku, hergav di dilê xwe de xerabiyê difikirin, Her roj, ji bo şer dişêwirin,

³Ew wek mar zimanê xwe tûj dikin, Jehra koremar di bin lêvên wan de ye.

⁴Ya Xudan, tu min ji destê yê xerab biparêze, Min biparêze ji zilamê zordar; Ew ku, dixwazin min averê bikin.

⁵Yên qure ji bo min dafik danîn, Li qeraxê rê ben tikandin; Ji bo min kemîn danîn.

⁶Min ji Xudan re got: «Xwedayê min tu yî.» Goh bide qêrîna min, ya Xudan.

⁷Ey hêza rizgariya min, ey Xudanê serwer, Di roja şer de, te serê min parast.

⁸Daxwaza xeraban neyne cih, ya Xudan, Niyeta wan a xerab pêşve nebe! Da ku qure nebin.

⁹Bila serê yên ku dor li min pêça ne, Xerabiya ku ji devê wan dertê binixême.

¹⁰Bila sotikên agir bi ser wan de bibarin! Bila bên avêtin nav agir û avên kûr, Û cardin ranebin.

¹¹Bila yên buxtankar li welat bi ser nekevin, Bila xerabî, zûka, nêçîr bike li zordar.

¹²Ez dizanim, Xudan doza bindestan dajo, Ji bo hejaran dibe daddar.

¹³Bêguman yên rastdar, spas dikin ji navê te re, Wê yên rast derkevin pêşberî te.