Read Kurmanji Încîl, 2009 Zebûr 144 Bible Online

Zebûr 144 - Kurmanji Încîl, 2009 bible

Zebûr 144

¹Bila zinarê min, Xudan pîroz be, Yê ku destên min ji bo şer, Tiliyên min ji bo cengê hîn kir!

²Ew e keremdar û keleha min, Ew e birc û rizgarkarê min, Ew e mertal û stargeha min, Wî kir ku gel, serî deynin li ber min!

³Ya Xudan, ma mirov çi ye ku tu wî bihesibînî, Kurê mirov çi ye ku tu wî bibîr bînî?

⁴Mirov wek hilmekê ye, Rojên wî, wek wê siyê ne ku diçin.

⁵Ya Xudan, ezmanan biqelêşe û dakeve, Xwe bi çiyayan bike, da ku pêkevin.

⁶Birûskê lêxe, dijmin belav ke, Tîrên xwe bişîne, wan ji ser hev xera ke.

⁷Ji jor ve destê xwe dirêj ke, min rizgar ke; Min ji avên kûr derîne, Ji destê kurên xelkê azad ke.

⁸Devê wan derewan dibêje, Destê wan ê rastê hîlekar e.

⁹Ey Xwedê, ez ji te re lavijeke nû bistrînim, Ez bi çenga dehtêl pesnê te bidim.

¹⁰Tu yî, yê ku serketinê dide padîşahan, Te evdê xwe Dawid, ji şûrê xerabiyê rizgar kir.

¹¹Min rizgar ke, Ji destê kurên xelqê azad ke. Devê wan derewan dibêje, Destê wan ê rastê hîlekar e.

¹²Hingê wê kurên me di xortaniya xwe de, Wek şaxên gihîştî bin, Wê keçên me, wek stûnên qesrê yên neqişandî bin.

¹³Wê embarên me, bi her cûre erzaqê tije bin; Miyên me, wê li nav zeviyên me, Bi hezar û deh hezaran berx bidin.

¹⁴Wê dewarên me xurt bin; Wê di sûrên me de qul neyên vekirin, Li kuçeyên me tunebe qêrîn.

¹⁵Xwezî bi wî gelî ku di vê rewşê de ye! Xwezî bi wî gelî ku Xudan Xwedayê wan e.