Read Kurmanji Încîl, 2009 Zebûr 25 Bible Online

Zebûr 25 - Kurmanji Încîl, 2009 bible

Zebûr 25

¹Ya Xudan, ez bi canê xwe nêzikî te dibim,

²Ey Xwedê, ez bi te ewle me, min nede şermê, Bila dijminên min nekenin bi min!

³Hemû yên ku bi hêvî ne, wê şermî nebin; Yên ku bêsedem çavsorî dikin, wê bibînin şermê.

⁴Ya Xudan, tu hînî min bike riyên xwe, Nîşanî min bide aliyên xwe.

⁵Bi rastiya xwe rê nîşanî min bide, ji bo min bibe hîndar. Çimkî tu yî ji bo min Xwedayê rizgarkar. Hêviya min hergav tu yî.

⁶Ya Xudan, heskirin û dilovaniya xwe bibîr bîne; Çimkî ew ji berê ve hene.

⁷Gunehên min ên xortaniyê û serhildanên min bibîr neyne, Li gor kerema xwe, Ji bo qenciya xwe min bibîr bîne ya Xudan.

⁸Rast û qenc e Xudan, Ji ber vê yekê rê nîşan dide li ber gunehkaran.

⁹Di riya edaletê de, ew e ji bo nefsbiçûkan rêber, Ew riya xwe nîşanî wan dide her û her.

¹⁰Ji bo yên ku peyman û şahidiya wî digirin, Hemû riyên Xudan kerem û rastî ne.

¹¹Ji bo navê xwe ya Xudan, Tu gunehê min bibexşîne, çimkî gellek mezin e.

¹²Her kî ku bitirse ji Xudan, Ew hînî wî dike riyan.

¹³Ewê bi firehî bijî ew însan, Nîjada wî mîras bistîne erdan.

¹⁴Sira Xudan ji bo wan e ku ji wî ditirsin, Ew wan haydar dike ji peymana xwe.

¹⁵Çavê min hergav li Xudan e, Çimkî ew lingê min dertîne ji toran.

¹⁶Li halê min binêre, li min were rehmê; Çimkî ez bindest û bêkes im.

¹⁷Zêde dibe tengahiya dilê min, Tu xelas ke min ji derdê min.

¹⁸Binêre li ketin û êşên min, Bibexşîne hemû gunehan li min!

¹⁹Li dijminên min binêre, ku çiqas pirr bûn, Bi çi awayî nefret dikin ji min.

²⁰Biparêze canê min, min azad ke! Min şermî neke, çimkî ez xwe dispêrim te.

²¹Bila rastî û durustî min biparêze, Hêviya min hergav tu yî.

²²Ey Xudan, biparêze Îsraêlê, Ji hemû tengahiyan!