Read Kurmanji Încîl, 2009 Zebûr 34 Bible Online

Zebûr 34 - Kurmanji Încîl, 2009 bible

Zebûr 34

¹Ezê hergav, şikir bikim ji bo Xudan, Pesnê wî ji devê xwe dernexim tu caran.

²Ez bi Xudan didim pesnê xwe, Bindest dibihîzin, distînin şahiya xwe!

³Bi min re mezinahiya Xudan bidin bihîstin, Em bi hev re navê wî bilind kin.

⁴Ez li Xudan geriyam wî bersîv da min, Wî ez azad kirim, ji hemû tirsên min.

⁵Yên ku li wî dinêrin, dibiriqe ser çavê wan, Ji şerman sor nabe rûyê wan.

⁶Vî bindestî kir hawar, bihîst wî Xudan, Wî ew xelas kir ji hemû tengahiyan.

⁷Dora yên ku jê ditirsin, dipêçe milyaketê Xudan, Û xelas dike wan.

⁸Tam bikin û bibînin, çi qenc e Xudan. Xwezî bi wî zilamî ku xwe spartiye Xudan!

⁹Ji Xudan bitirsin, ey hûn pîrozên wî, Çimkî kêmahiya wî çênabe, yê ku ditirse ji wî.

¹⁰Birçî û muhtac dibin, şêrên ciwan, Belê tu qencî, ji yên ku li Xudan digerin nayê dirixan.

¹¹Werin ey zarokno, goh bidin min ji can, Ezê hînî we bikim tirsa Xudan.

¹²Kî dixwaze ji jînê kêf bistîne, Rojên xweş û dirêj bibîne?

¹³Zimanê xwe ji xerabiyê, Lêva xwe bigire ji hîlekariyê.

¹⁴Ji xerabiyê bireve, qenciyê bike, Li aştiyê bigere, li pey wê here.

¹⁵Çavê Xudan li ser rastan e, Gohên wî vekirî li hawara wan e.

¹⁶Ruyê Xwedê li hember xerabîkaran e, Da ku navê wan ji dinê hilîne.

¹⁷Feryada rastan, dibihîze Xudan, Wan azad dike ji hemû tengahiyan.

¹⁸Nêzikî dilşikestiyan e Xudan, Ruhê wî rizgar dike bindestan.

¹⁹Pirr gellek in derdê rastan, Belê Xudan wan xelas dike ji hemûyan.

²⁰Digre ew hemû hestiyên wan, Nahêle ku yek bişikê ji wan.

²¹Xerabî, yê xerab dukuje, Yê ku ji yê rast nefret dike, tê dadbarkirin.

²²Ji bo evdên xwe xilaskar e Xudan, Yên ku xwe dispêrin wî, nastînin tu cezayan.