Read Kurmanji Încîl, 2009 Zebûr 40 Bible Online

Zebûr 40 - Kurmanji Încîl, 2009 bible

Zebûr 40

¹Ez bi sebir li benda Xudan mam; Bi ser min ve xwar bû, bihîst feryada min.

²Ji çala mirinê, Ji ritama heriyê ez deranîm, Lingê min li ser zinar da rawestan, Gavên min şidand.

³Wî stranek nû kir devê min, Ji bo Xwedayê me îlahiyek pesindanê da min. Wê gellek bibînin û bitirsin, Û bi Xudan ewle bin.

⁴Xwezî bi wî ku ewle ye bi Xudan, Rû nade pozbilind û derewkaran.

⁵Ya Xudan, Xwedayê min, Karên te yên zor ciwan, çiqas pirr in fikrên te ji bo mirovan; Tu kes nîne mîna te, Ez bidim bihîstin, bixwazim bêjim, Nayê dawiya wan.

⁶Tu kêf nastînî ji qurban û pêşkişkirinê, Belê min gohên xwe vekirin. Tu qurbana şewatê û ya guneh jî naxwazî.

⁷Hingê min got: «Va ye ez têm; Di tomara kitêbê de li ser min hatiye nivîsîn.

⁸Ez zewqê ji bicihanîna daxwaza te distînim, ey Xwedayê min, Di kûrahiya dilê min de ye şerîeta te.»

⁹Min di civîna mezin de mizgîna rastiyê da, Ezê devê xwe negirim, Ya Xudan tu dizanî bi min!

¹⁰Min edaleta te di dilê xwe de veneşart, Min ji dilsozî û rizgariya te got, Min kerem û rastiya te ji cîvînên mezin veneşart.

¹¹Ya Xudan, ji min nedirixîne dilovaniya xwe! Bila min biparêze hergav, kerem û rastiya te!

¹²Bêhed belayan, girt der û dora min, Gunehan ez girtim, nema hêza nihartina min; Hê zêdetir in ji porê serê min, Û ez terikandim dilê min.

¹³Razî be ya Xudan, bi azadkirina min! Ya Xudan, bazde alîkariya min.

¹⁴Yên ku li kuştina min digerin, Bila şerm bikin, rûreş dagerin, Yên ku şa dibin bi halê min ê xerab, Bila riswa bibin, paş ve vegerin!

¹⁵Yên ku ji bo min, «Ox! Ox!» dibêjin, Bila ji şermbûna xwe şaş bibin!

¹⁶Yên ku li te digerin, Bila bi te rihet û şa bin! Yên ji rizgarkirina te hez dikin, Bila hergav bêjin, «Xudan mezin e!»

¹⁷Ez ku bindest û hejar im, Tu min bifikire ya Xudan! Tu yî alîkar û xelaskarê min, Dereng nemîne, ey Xwedayê min.