Read Kurmanji Încîl, 2009 Zebûr 44 Bible Online

Zebûr 44 - Kurmanji Încîl, 2009 bible

Zebûr 44

¹Ey Xwedê, me bi gohên xwe bihîst, Bav û kalên me ji me re gotin, Ka te çi kiriye di rojên wan de, di dema borî de.

²Te bi destê xwe berda miletan, Û ew bi cih kirin li şûna wan; Te şikand miletan, Belê firehî anî ji bo wan.

³Wan welat bi şûr nestand, Wan xwe rizgar nekir bi baz û bendan. Belê ev, bi destê te yê rastê û bi milê te, bi dîdara ronahiya te çêbû; Çimkî te ji wan hez kir.

⁴Ey Xwedê, tu yî padîşahê min, Emir bike, rizgarbûna Aqûb!

⁵Bi saya te emê belav bikin dijminên xwe, Bi navê te emê bipelçiqînin hemberên xwe.

⁶Çimkî ez ne bawer im bi kevanê xwe, Şûrê min jî min rizgar nake;

⁷Lê te em xelas kirin ji dijminên me, Şermî kir, yên ku nefret dikin ji me.

⁸Her roj em pesnê Xwedê didin, Ji navê te re her û her spas dikin.

⁹Lê niha te em berdan, em riswa kirin, Bi ordiyên me re, tu naçî şer.

¹⁰Li hember dijmin te em şûn ve şandin, Yên ku ji me nefret dikin, em şêlandin.

¹¹Te em kirin wek miya ku tê şerjêkirin, Û te em li nav miletan belav kirin.

¹²Te pirr erzan firot gelê xwe, Û bi buhayê wan kar nekir.

¹³Te em kirin rûreşên cîranan, Tinaz û pêkeniya, yên der û dora me.

¹⁴Te em kirin zimanê miletan, Xelq dikenin bi halê me tevan.

¹⁵Rezaleta min, tevê rojê li ber çavan, Ji şerman ez ketime bin erdan.

¹⁶Yê ku li min neheqiyê dike û dide çêran, Dijminê ku li heyfê digere, rawestî li hember min.

¹⁷Ev hemû hatin serê me, Dîsa jî me te jibîr nekir, Bi peymana te re bêbextî nekir,

¹⁸Şûn ve nezivirî dilê me, Ji riya te derneketin gavên me.

¹⁹Belê te em, li warê kûzeyan pelçiqandin, Bi tarîstanê, ser me da nixamtin.

²⁰Eger me ji bîr bikira navê Xwedayê xwe, Li ber îlahek xerîb vekira destê xwe,

²¹Ma Xwedê ev dernedixist meydanê? Çimkî ew dizane bi sirrê dilan.

²²Tevahiya rojê ji bo te em tên kuştin, Wek miyên şerjêkirinê tên hesibandin.

²³Hişyar be ya Reb! Bo çi tu radizêyî? Rabe û her û her me bernede.

²⁴Bo çi tu dinixêmî rûyê xwe, Bo çi, tu jibîr dikî cefa û bindestiya me?

²⁵Çimkî em, heta axê tewiyan, Bi erdê ve zeliqî bedena me.

²⁶Rabe û were alîkariya me! Bi xatirê kerema xwe, xelas ke me!