Read Kurmanji Încîl, 2009 Zebûr 46 Bible Online

Zebûr 46 - Kurmanji Încîl, 2009 bible

Zebûr 46

¹Xwedê stargeh û hêza me ye, Di tengahiyê de hergav amade û alîkarê me ye.

²Ji ber vê yekê, dinya serobino bibe, Çiya biqelibin himêza deryayan,

³Av bilind bibin, li hev biqelibin, Bi nepixîna wan derya bilerizin, em natirsin.

⁴Çemek heye ku ava wê, şahiyê tîne bajarê Xwedê, Şa dike mala pîroz a Berzê Berzan.

⁵Xwedê di nav wî de, Nalerize ew bajar. Berdestî sibê, Xwedê tê alîkariya wê.

⁶Milet digurmijin, welat hejiyan, Wî deng da, dinya heliya.

⁷Xudanê ordiyan bi me re ye, Xwedayê Aqûb birca me ye.

⁸Werin û bibînin karên Xudan, Xerakirina ku wî anî ser erdan.

⁹Şeran dide rawestin li çar aliyên dinê, Kevan dişikêne, perçe dike riman. Dişewitîne erebên cengê, bi agiran.

¹⁰«Bîhnfireh bin û bizanibin ku ez im Xwedê, Ezê bilind bibim li nav netewan, Bilind bibim li rûyê erdê!»

¹¹Xudanê ordiyan bi me re ye, Xwedayê Aqûb birca me ye.