Read Kurmanji Încîl, 2009 Zebûr 49 Bible Online

Zebûr 49 - Kurmanji Încîl, 2009 bible

Zebûr 49

¹Ey hemû gelno, gohdar bin! Yên li dinê rûniştî, hûn hemû.

²Zarokên xelqê, zarokên began, Dewlemend û xizan, bi hev re goh bidin!

³Wê şehrezayî bibare ji devê min, Têgihîştiniyê bêje, fikra dilê min.

⁴Ezê goh bidim meselan, Bi lîrê şîrove kim sirran.

⁵Bo çi ezê bitirsim ji fesada yên ku dane pey min, Di roja xerab de ew bipêçin hawirdora min?

⁶Yên ku ewle ne bi dewlemendiya xwe, Yên ku pesindar in bi pirbûna serweta xwe.

⁷Kes nikare bedelê jiyana birayê xwe bide, Li ba Xwedê fîdye çênabe.

⁸Ji ber ku biha ye fîdya can, Kes wê nade ber çavan.

⁹Eger ne weha be, Wê her û her bijî însan. Nebîne rûyê goran.

¹⁰Bêguman, herkes dizane ku şehreza dimirin, Ahmeq û sexik tune dibin. Û malên xwe ji kesên din re dihêlin.

¹¹Fikra dilê wan ev e: Wê mala wan her û her, stara wan ji nifşan heta nifşan bimîne, Axa wan bi navê wan bê bangkirin.

¹²Bi hemû rûmeta xwe, her û her namîne însan, Ew jî bi mirin e, wekî heywan.

¹³Ev e dawiya ahmeqan, Û yên ku bawerî tînin bi gotinên wan.

¹⁴Ewê wek keriyê miyan, bên ajotin diyarê miriyan, Wê mirin bibe şivanê wan. Bi avêtina rojê re, wê rastî li ser wan bibe serwer, Wê birize cesedê wan, Êdî diyarê miriyan bibe mala wan.

¹⁵Belê wê Xwedê, Canê min xelas ke ji diyarê miriyan, Û min qebûl bike.

¹⁶Eger yek dewlemend bû, Rewnaka mala wî zêde bû, netirse.

¹⁷Çimkî di mirina xwe de, nikare tiştekî bi xwe re bibe, Hebûna wî, bi wî re naşeqite gorê.

¹⁸Li jînê xwe dilgeş bihesibîne, Di serkeftinê de bê pesindan jî,

¹⁹Wê beşdarî nifşê bav û kalan bibe, Ew ku, wê qet ronahiyê nebînin.

²⁰Bi hemû rewnaqiya xwe ji têgihîştinê dûr e însan, Helaq dibe û diçe, wek heywan.