Read Kurmanji Încîl, 2009 Zebûr 51 Bible Online

Zebûr 51 - Kurmanji Încîl, 2009 bible

Zebûr 51

¹Ey Xwedê, li gor kerema xwe, Ber min bikeve; Bi pirrbûna dilovaniya xwe, Paqij bike serhildanên min.

²Bi tevahî min bişo ji sûcê min, Min paqij ke ji gunehê min.

³Çimkî ez dizanim serhildanên xwe, Hergav li pêş min e sûcê min.

⁴Li hember te, tenê min li ber te sûc kir, Min ya ku, li pêş çavê te xerab bû kir. Îcar tu, di gotinê de mafdar, Di dadbarkirinê de rastdar î.

⁵Va ye ez, di nav sûc de hatim dinê, Dayika min, di nav guneh de bi min ducan ma.

⁶Madem tu ji dil û can rastiyê dixwazî, Şahrezayiyê têxe, kûrahiya dilê min.

⁷Min bi zûfa bişo da ku ez pak bibim, Min bişo da ku ez ji berfê spîtir bibim.

⁸Kêf û şahiyê bi min bide bihîstin, Da ku şa bin hestiyên ku te pelçiqandin.

⁹Ruyê xwe binixême li hember gunehên min, Paqij bike hemû sûcên min.

¹⁰Ey Xwedê, tu dilekî pak bide min, Nû û zexim bike, ruhê hundirê min.

¹¹Min ji huzûra xwe navêje, Ruhê xwe yê pîroz ji min nestîne.

¹²Şahiya rizgarkirina xwe, bi şûn ve bide min, Bi ruhekî dilxwaz tu bike piştgiriya min.

¹³Ezê riyên te, hînî serhildêran bikim, Û ewê gunahkar, dîsa li te vegerin.

¹⁴Tu min xelas bike ji xwînrêtinê, Ey Xwedayê min, Xwedayê rizgarkirinê, Bila zimanê min, bi lavijan pesnê xelaskirina te bide.

¹⁵Ya Reb, veke lêvên min, Bila devê min, pesnê te bide bihîstin.

¹⁶Çimkî tu hez nakî ji qurbanê, Razî nabî bi şewitandina gorîdanê, An na, minê ji te re pêşkiş bikira.

¹⁷Qurbana ku tu qebûl dikî ruhê şikestî ye, Ey Xwedê, tu dilê şikandî û tobekar biçûk nabînî.

¹⁸Bi kerema xwe qencî bike bi Siyonê, Ji nû ve ava bike sûrên Orşelîmê.

¹⁹Hingê qurbanên ku rast tên dayin, Ji hemû goriyên şewitandinê, Tê kêf bistînî; Hingê li gorîgeha te, wê conega bên gorîkirin.