Read Kurmanji Încîl, 2009 Zebûr 59 Bible Online

Zebûr 59 - Kurmanji Încîl, 2009 bible

Zebûr 59

¹Min xelas ke ji dijminên min, ey Xwedê, Li hember dijminan bibe keleha min.

²Min azad bike ji sûcdaran, Min xelas ke ji xwîndaran.

³Îcar niha, dixwazin jiyana min bistînin, Yên hêzdar li hember min dicivin, Belê, ne min serî hilda û ne jî min guneh kir, ya Xudan.

⁴Bi ser ku ez bêrî me, Xwe amade dikin, ji bo êrîşkirina min. Rabe, hişyar be, were alîkariya min!

⁵Û tu ya Xudan, Xwedayê ordiyan, Xwedayê Îsraêlê, Hişyar be, hemû mîletan bitoqlîne, Ber tu kesê xayîn û xerab nekeve!

⁶Êvarê vedigerin, wek kûçikan dikin xirrîn, Û li bajêr digerin.

⁷Ji devê wan xerabî dibare, Şûr dertên ji lêvên wan. «Ma wê kî bibihîze?» dibêjîn.

⁸Belê tu, bi wan dikenî ya Xudan, Şa dibî bi hemû netewan.

⁹Hêza min tu yî, ezê li te binêrim, Çimkî Xwedê birca min a bilind e.

¹⁰Xwedayê mîn, bi kerema xwe tê pêşiya min, Ew nîşanî min dide hilweşîna dijminê min.

¹¹Wan nekuje, da ku gelê min jibîr neke, Bi hêza xwe wan belav ke û bixîne, Ya Reb, tu yî mertalê me.

¹²Bila ji ber gunehê devê xwe, gotinên lêvên xwe, Ji ber derew û lanet xwendina xwe, Di quretiya xwe de bifetisin.

¹³Biqedîne, bi xezebê biqedîne, bila nemînin; Bila bizanibin ku heta dawiya kujê erdê, Serweriya Xwedê bi Aqûb re ye.

¹⁴Bila êvarê vegerin, wek seyan biewtin, Û li bajêr bigerin.

¹⁵Ji bo xwarinê wê eware bigerin, Têr nebin, wê şeveder bimînin.

¹⁶Herçî ez im, ezê ji hêza te re lavijan bêjim, Serê siban, kerema te bînim ziman. Çimkî tu yî birca min a bilind, Di roja teng de bûyî stara min.

¹⁷Ey hêza min, ezê ji te re lavîjan bêjim, Çimkî Xwedê bîrca min a bilind e, kerema min e.